भारतीयलाई प्रवेश नदिँदा सशस्त्रमाथि आक्रमण

रौतहट- रौतहटमा सीमामा खटिएका सशस्त्र प्रहरीमाथि आक्रमण भएको छ । सीमानाका बन्द रहेको अवस्थामा एक भारतीय महिलालाई रौतहट प्रवेशमा रोक लगाउँदा भारतीय नागरिकको समूहद्वारा सीमामा खटिएका सशस्त्र प्रहरीमाथि आक्रमण भएको हो ।

आक्रमणमा ड्युटीमा खटिएका सशस्त्र प्रहरी बल नेपाल सीमा सुरक्षा बेस सरमुजवाका वरिष्ठ हवल्दार लीलाबहादुर थापा घाइते हुनुभएको छ ।

हँसिया प्रहारबाट वरिष्ठ हवल्दार थापा घाइते भएपछि स्थितिलाई नियन्त्रणमा लिन सशस्त्र प्रहरीले एक राउण्ड हवाई फायर गर्नुको साथै एक भारतीय नागरिकलाई नियन्त्रणमा लिइएको सशस्त्र प्रहरी बल नेपाल प्रदेश २ नं बर्दिवासका प्रमुख डीआइजी कृष्णभक्त ब्रह्माचार्यले जानकारी दिनुभएको छ ।-