डडेल्धुरामा काठ तस्करी बढ्दो

डडेलधुरा- डडेल्धुराको भित्रि मधेशमा विकास निर्माणका नाममा काठको तस्करी बढेको छ ।
जिल्लाको आलिताल गाउँपालिका वडा नम्वर ८ मा सडक निर्माणका नाममा काटिएका १ सय ५२ थान सालका गोलिया डिभिजन वन कार्यालय डडेल्धुराले वरामद गरेको हो ।

वडा नम्वर ८ को गोदाम बजारदेखि डोला गाउँ जोड्ने सडक निर्माण गर्ने क्रममा सालका रुख काटी गोलिया बनाएर लुकाई छिपाई राखेको अवस्थामा वरामद गरेको डिभिजन वन कार्यालय डडेल्धुराका निमित्त प्रमुख डवल वोहराले वताउनुभयो ।

यहाँको रजनी सामुदायिक वन र सोही क्षेत्रमा रहेको राष्ट्रिय वनमा नेपाल सरकार र आलिताल गाउँपालिकाको वजेटबाट करिव ६ किलोमिटर सडकको निर्माण उग्रतारा कन्ट्रक्सनले गरेको हो ।

सडक निर्माण भएको सामुदायिक वनका अध्यक्ष सहित एक जना स्थानीयलाई डिभिजन वन कार्यालय डडेलधुराले पक्राउ गरी छानविन शुरु गरेको छ ।

स्थानीय तहदेखि वन कर्मचारीको मिलेमतो हुन सक्ने भएकाले निश्पक्ष छानविन हुनुपर्ने स्थानीयको माग छ । सडक निर्माण गर्दा प्रयोग गरिएको डोजरले सालका रुख ढालेको थियो ।

वन क्षेत्रमा सडक निर्माण गर्दा अनिवार्य रुपमा प्रारम्भिक वातवरणीय प्रभाव मुल्याङ्कन गरिनुपर्ने भएपनि प्रक्रिया झनझटिलो हुने भन्दै स्थानीय तहले भने मनपरि रुपमा सडक निर्माण गर्ने गरेका छन् ।।