कोरोना संक्रमणमुक्त चिकित्सको अनुभव– मृत्युको मुखबाट फर्किएँ (भिडियो सहित)

काठमाडौं– नेपालमा कोभिड १९ का विरामीको दिनप्रतिदिन बढ्दै गएको छ । कोरोना भनेको सामान्य हो भनी हल्का रुपमा नलिइ अनिवार्य रुपमा स्वास्थ्य मापदण्ड पालना गर्न चिकित्सकहरुले सुझाउँदै आएका छन् । तर कोरोना संक्रमण भइसकेपछि यसले कस्तो रुप लिन्छ भन्ने कुरा अनुमान गर्न नसकिने स्वयं संक्रमितहरुको अनुभव छ ।

नेपालमा कोरोना भाइरस संक्रमितको संख्या दिनप्रतिदिन बढिहेको छ । र हरेक दिन संक्रमितहरुको मृत्यु पनि भइरहेको छ । संक्रमित हुनेहरुबाट मृत्यु हुनेहरुको संख्यालाई प्रतिशतमा हेर्ने हो भने शुन्य दशमलव ६४ प्रतिशत हो । त्यसो त निको हुनेहरुको संख्या पनि दिनप्रतिदिन बढी नै रहेको छ । कोरोना सङ्क्रमण मुक्तज हुनुभएकाहरुलाई प्रतिशतमा हेर्ने हो भने ६५ प्रतिशत हो । पछिल्लो समय ५८ प्रतिशतबाट बढेर ६५ प्रतिशतमा पुगेपनि यो अवस्थालाई राम्रो भन्न भने सकिन्न ।

यो परिस्थितिमा कोरोना भनेको सामान्य हो भनी नजरअन्दाज गर्नु ठूलो भूल हुने भर्खरै कोरोना संक्रमणबाट मुक्त हुनुभएका डा। ज्ञानेन्द्रमान सिंह कार्की बताउनु हुन्छ । तर स्वास्थ्य मापदण्ड पालना गर्दै सतर्कता अपनाउदा भने डर मान्नुपर्ने अवस्था नरहेको उहाको भनाई छ । वृद्ध व्यक्ति, जवान, बालबालिका जुनसुकै उमेरकालाई पनि कोरोना संक्रमण हुन सक्ने र संक्रमण भई सकेपछि यसले कस्तो रुप लिन्छ भन्ने अनुमान गर्न नसकिने हुदा हामी सबै सचेत र सतर्क रहनुपर्ने सुझाब दिनुहुन्छ डा कार्की । स्वास्थ्य मन्त्रालयको नियमित प्रेस ब्रिफिङमा उहाले आफू पनि मृत्युको मुखबाट फर्केर आएको अनुभव सुनाउनुभयो ।

कोरोनाबाट निको भएकाहरुबाट संक्रमण सर्दैन भन्नुहुँदै निको भएकाहरुलाई घर समाजले विभेद र अपमान गर्नुको सट्टा माया र हौसला प्रदान गर्नुपर्ने बताउनुहुन्छ डा कार्की ।

सामाजिक तथा सास्कृतिक चाडपर्व मनाउने क्रममा तथा किनमेल गर्ने क्रममा नागरिकहरु त्यति सचेत र सजक भएको देखिदैन । त्यसैले अनिवार्य मास्क लगाउन , भीडभाडमा नजान, सामाजिक दूरी कायम गर्न साबुन नपानीले हात धुन तथा स्यानीटाईजरको प्रयोग गर्न चिकित्सकहरुले सुझाव दिदै आएका छन् । अहिले कोरोनाको कुनैपनि औषधि पत्ता नलगाइसकेको अवस्थामा सरकारले तोकेको स्वास्थ्य मापदण्ड अपनाउनुको अरु विकल्प छैन । त्यसैले सतर्क रहौं स्वस्थ बनौं ।