उदयपुरको कटारीमा खुकुरी प्रहार गरी एक महिलाको हत्या

उदयपुर- उदयपुरको कटारी नगरपालिकामा ११ लखथुम्कामा धारिलो हतियार प्रहार गरी एक महिलाको हत्या भएको छ ।

इलाका प्रहरी कार्यालय कटारीका अनुसार स्थानीय ४२ वर्षीया डोरकुमारी राउतको खुकुरीको प्रहारबाट शुक्रबार राती हत्या भएको हो ।

इलाका प्रहरी कार्यालय कटारीका डिएसपी हेमन्त भण्डारी क्षेत्रीका अनुसार शनिबार बिहान स्थानीय २५ वर्षे रोशन मगर राउतको हत्या गरेको आरोपमा पक्राउ परेका छन् । ‘टाउकोमा खुकुरी प्रहार गरेको देखिन्छ,’ डिएसपी भण्डारीले भन्नु भयो, ‘हत्या गरेको आरोपमा मगरलाई घरैबाट पक्राउ गरेर अनुसन्धान सुरु गरेका छौँ ।’

मृतकको शव पोष्टमाटमको लागि कटारी अस्पताल ल्याईएको छ । कटारी नगरपालिका ११ का वडा अध्यक्ष सरोज बुढाथोकीले लागूऔषधमा लठ्ठिएर मगरले हत्या गरेको हुन सक्ने जानकारी दिनुभयो ।

‘बिहान कटारी बजार गएर लागूऔषध सेवन गरेर फर्केको देखिन्छ, वडा अध्यक्ष बुढाथोकीले भन्नुभयो ‘लागूऔषधको बेहोसी मै हत्या गरेको हुनुपर्छ । प्रहरीको अनुसन्धानपछि नयाँ रहस्य आउँछ होला ।’