पहिरोमा परेर एक जनाको मृत्यु, तीन जनाको जीवितै उद्दार

पर्वत- पर्वतको फलेवास नगरपालिका-४ मुडिकुवामा पहिरोले घर पुरिँदा एक जनाको मृत्यु भएको छ । स्थानीय नबिन विकको घर पहिरोले पुरिँदा उहाँकी दुई बर्षिय छोरी निकिता विकको मृत्यु भएको हो ।

जिल्ला प्रहरी कार्यालयका अनुसार पहिरोले बगाई बेपत्ता भएकी बिकको शव घर भन्दा एक मिटर तल भेटिएको छ । पहिरोमा ४ जना परेकोमा गाउँलेले घाईते अवस्थामा तीनजनाको उद्धार गरेका छन् ।

पहिरोले बगाएर बाँसको झाँगमा अड्किएको अवस्थामा तीनजनाको उद्धार गरेका हुन् । पहिरोले गोठ समेत पुरेको र क्षतिको बिबरण आइनसकेको प्रहरी नायब उपरिक्षक बिश्वराज अधिकारीले जानकारी दिनुभयो ।

दोबिल्ला फलेवास सडक समेत पहिरोले क्षतबिक्षत भएको छ । स्थानीय थानेश्वर भुसालको गोठ पनि पहिरोले पुरिएको छ । यता स्थानीय रामप्रसाद तिवारी गोठ पनि पहिरोले पुरेको छ । गोठ पुरिँदा एउटा गोरु पनि मरेको छ । क्षतिको पूर्ण विवरण आउन बाँकी रहेको वडाध्यक्ष टिकाराम गौँडेलले जानकारी दिनुभयो ।-