रोल्पाको माडीमा असोज १ देखि विद्यालय खुल्ने

रोल्पा– रोल्पाको माडी गाउँपालिकामा असोज १ गतेदेखि विद्यालय सञ्चालन हुने भएको छ । माडी गाउँपालिका गाउँ शिक्षा समितिको सोमबार बसेको बैठकले असोज १ गतेदेखि सबै विद्यालयहरु सञ्चालन गर्ने निर्णय गरेको हो ।

गाउँपालिकामा हालसम्म कोराना नदेखिएको र कोरोनाका कारण नयाँ शैक्षिक सत्र खेर जान नदिनका लागि सतर्कता अपनाउँदै विद्यालय खोल्ने निर्णयमा पुगेको गाउँपालिकाले जनाएको छ ।

स्वास्थ्य मापदण्डको पूर्ण पालना गर्दै विद्यालयहरु सञ्चालन गर्ने निर्णय गरिएको माडी गाउँपालिका–५ का वडाध्यक्ष तथा गाउँ शिक्षा समितिका सदस्य भरत बुढाले बताउनुभयो ।

कोरोना कहरकाबीच पनि विद्यालय खोल्ने निर्णय गर्ने यो स्थानीय तह नै पहिलो भएकाले यसलाई गम्भीर निर्णय समेत भनिएको छ ।