पाल्पा पहिरो अपडेटः एक महिलाको मृत्यु ५ जना अझै बेपत्ता

पाल्पा- पाल्पाको रम्भा गाउँपालिका वडा नं. २ फोक्सिङकोटको सुरुङडाँडामा पहिरोले घर पुरिँदा एक जना महिलाको मृत्यु भएको छ भने सोही वडाको बेलौजाका दुई घर पुरिँदा ५ जना बेपत्ता भएका छन ।

आज बिहान पहिरोले घर पुरिदा सुरुङडाँडाकी २७ वर्षीया मोतिसरा गाहाको मृत्यु भएको प्रहरीले जनाएको छ । उनका श्रीमान वीरबहादुर गाहा भने भागेर ज्यान जोगाउन सफल भएका छन् ।

यस्तै अविरल वर्षासंगै खसेको पहिरोले दुई घर पुरिदा बेलौजाका एकै परिवारका ५ जना वेपत्ता भएको जिल्ला प्रहरी कार्यालय पाल्पाले जनाएको छ ।

स्थानीय हुम बहादुर गाहा र मान बहादुर गाहाको घर पहिरोले पुरिदा हुम बहादुरको परिवारका ५ जना वेपत्ता भएका वडा अध्यक्ष उमानसिंह सारुले बताउनुभयो । मानबहादुर गाहाको परिवारका तीन जनाले भने भागेर ज्यान जोगाउन सफल भएको वडा अध्यक्ष सारुले बताउनुभयो ।

पानी परिरहेको र पहिरो खस्ने क्रम नरोकिएको हुँदा उद्दारमा समस्या भएको प्रहरीले जनाएको छ । उद्दारका लागि गएको शसस्त्र प्रहरी र नेपाली सेनाको टोली बिच बाटोमा पहिरो खसेपछि अझैसम्म पनि घटनास्थल पुग्न सकेको छैन ।।