अमेरिकी राष्ट्रपति निर्वाचनः दोस्रोपटक पनि टेलिभिजन बहस रद्द

न्यूयोर्क– संयुक्त राज्य अमेरिकामा राष्ट्रपति पदका उम्मेदवारबीच आयोजना गरिने टेलिभिजनको दोस्रो बहस रद्द भएको छ ।

राष्ट्रपतीय बहस आयोगले विज्ञप्ति जारी गर्दै आगामी अक्टुबर १५ का लागि तय गरिएको रिपब्लिकन राष्ट्रपति डोनाल्ड ट्रम्प र डेमोक्र्याटिक प्रत्याशी जो बाइडेन बीचको बहस नहुने जनाएको हो । राष्ट्रपति ट्रम्पलाई कोरोना सङ्क्रमण भएकोले गर्दा प्रत्यक्ष बहस आयोजना गर्न नसकिएपछि भर्चुअल गर्ने तयारी गरिएको थियो।

तर राष्ट्रपति ट्रम्पले भर्चुअल बहस गर्न नमानेपछि कार्यक्रम स्थगित गरिएको हो । सो विज्ञप्तिमा भनिएको छ– जनस्वास्थ्य विज्ञहरुको सल्लाहमा प्रत्यक्ष कार्यक्रम रद्द गरेर भर्चुअल बहसका लागि गरिएको प्रस्तावलाई ‘समयको बर्बादी’ भन्दै ट्रम्पले सहभागि नहुने जनाएपछि दोस्रो बहस नै रद्द गरिएको हो ।

दुवै उम्मेदवारका अभियानले त्यस मितिका लागि वैकल्पिक योजनाको घोषणा गरेका छन् । पूर्व निर्धारित कार्यक्रम अनुसार दोस्रो बहस अक्टोवर १५ मा मायामीमा हुने तय गरिएको थियो।