बन्द भएको ३ बर्षपछि बल्ल खुल्यो- लाप्चाने इलाका प्रशासन कार्यालय
रामेछाप- अधिकृत स्तरको कर्मचारी नभएकाले वितग ३ बर्षदेखि बन्द भएको रामेछापको उमाकुण्ड गाउँपालिकामा पर्ने लाप्चाने इलाका प्रशासन कार्यालय बल्ल संचालनमाआएको छ ।
सरकारले अहिले यो कार्यालयमाअधिकृत स्तरको कर्मचारी पठाएपछि कार्य संचालन हुन थालेको हो । जिल्लाको सवैभन्दा दुर्गम मानिने यो क्षेत्रमा ५ बर्ष अगाडि इलाका प्रशासन कार्यालय स्थापना गरिएको थियो । तर अधिकृत स्तरका कर्मचारी नभएपछि बन्द भएको यो कार्यालय अहिले संचालनमा आएको रामेछापकी प्रमुख जिल्लाअधिकारी रुद्रादेवी शर्माले जानकारी दिनुभयो ।
इलाका प्रशासन कार्यालयले मुद्धा, शान्ति-सुरक्षा, संघ संस्था, हातहतियार, बजार अनुगमनबाहेक अन्य कामसमेत सम्पादन गर्नेगर्छ । नागरिकता प्रमाण-पत्र, राहदानी शिफारिस र जनजाति प्रमाणितको काम स्थानीय स्तरमा नै गर्नका लागि सरकारले इलाका प्रशासन कार्यालयको व्यवस्था गरेको थियो ।
कार्यालय संचालनमा आएपछि उमाकुण्ड गाउँपालिका र गोकुलगंगा गाउँपालिकाकाको केहि भागका नागरिकले सोहि कार्यालयबाटै सेवा लिन थालेका छन । विसं २०७३ साउनमा जिल्ला प्रशासन कार्यालयबाट प्रमुख जिल्लाअधिकारी सहितको राजनैतिकदलका नेता, पत्रकार तथा नागरिकअगुवाहरु गएर यहाँ इलाका प्रशासन कार्यालय स्थापना गरेकाथिए ।
अधिकृतसहित ५ जनाकर्मचारीको दरबन्दी रहेको उक्त कार्यालयमा एक जना पनि कर्मचारी नभएपछि कार्यालय बन्दभएको थियो । तीनबर्ष अगाडि ताला लगाएर मन्थली झरेका कर्मचारी अहिले गएर ढोका खोलेर सेवा दिन थालेको स्थानीय श्याम श्रेष्ठले बताउनु भयो ।
सेवा बन्द भएको तीन बर्षसम्म लाप्चानेबाट न कार्यालय हटाइएको थियो न त्यहाँ सेवा संचालनका लागि कर्मचारी नै खटाइएको थियो ।कार्यालय बन्द भएको लामो समयपछि सेवा पाएकोमा स्थानीयहरु खुशी भएका छन।।
प्रतिक्रिया राख्नुहोस्