ढुक्क भएर खोप लगाउन प्रधानमन्त्रीको आग्रह

काठमाडौं- प्रधानमन्त्री के पी शर्मा ओलीले आज खोप लगाएर दोस्रो चरणको कोरोना विरुद्धको खोप अभियान शुभारम्भ गर्नुभएको छ ।
प्रधानमन्त्रीले खोप लगाउनु भएसँगै आम जनमानसमा खोपप्रतिको कुनै नकारात्मक भावना भए पनि त्यसको निराकरण हुने विश्वास गरिएको छ ।

पहिलो चरणमा स्वास्थ्यकर्मी, पत्रकार, कर्मचारी, सांसद लगायतलाई खोप लगाइएको हो ।

प्रधानमन्त्री केपी शर्मा ओलीले कोभिड-१९ विरुद्धको खोप ‘कोभिशिल्ड’ लगाउनु भएको हो ।

प्रधानमन्त्री ओलीले त्रिभुवन विश्वविद्यालय शिक्षण अस्पताल, महाराजगञ्जमा खोप लगाएर दोस्रो चरणको खोप अभियानको औपचारिक शुभारम्भ गर्नुभएको हो ।

त्यस अवसरमा प्रधानमन्त्रीकी धर्मपत्नी राधिका शाक्यले पनि कोभिड विरूद्धको खोप लगाउनुभयो ।

खोप लगाएपछि प्रधानप्रधानमन्त्री ओलीले आफूले कोरोना विरुद्धको खोप लगाएको लगाएको र कुनै पनि असर नदेखिएको बताउँदै ढुक्क भएर सबैलाई खोप लगाउन आग्रह गर्नुभयो । लामो अनुसन्धान र विभिन्न चरणमा परीक्षण भएकाले खोप प्रभावकारी र विश्वसनीय भएको पनि त्यस बखत बताउनु भयो ।

प्रधानमन्त्री ओलीले खोप लगाउनु भएपछि देशभरी नै कोरोना विरुद्धको दोस्रो चरणको खोप अभियान शुरु भएको हो । राजधानी काठमाडौं लगायत देशभरिका खोप केन्द्रमा खोप लगाउने कार्य शुरु भएको छ ।

सरकारले दोस्रो चरणको खोप अभियान अन्तर्गत ६५ वर्षमाथिका ज्येष्ठ नागरिकलाई देशैभरी खोप कार्य सञ्चालन गर्दैछ । यस अभियान अन्तर्गत करीब १६ लाख ज्येष्ठ नागरिकलाई प्राथमिकतामा राखी खोप प्रदान गर्ने लक्ष्य सरकारको छ ।

यस अघि पहिलो चरणमा कोरोना नियन्त्रण र रोकथाममा अग्रभागमा खटिएर काम गर्ने स्वास्थ्यकर्मी, पत्रकार, कर्मचारी, सांसद, जेलमा रहेका कैदी लगायतका विभिन्न क्षेत्रका व्यक्तिहरुलाई खोप लगाइएको थियो ।।