कर्णालीमा आत्महत्या गर्ने ५ जनामध्ये ४ जनाको शव भेटियो

दैलेख- दैलेखको आठविस नगरपालिका–३ निमाइलका एउटै घरका ५ जनाले कर्णाली नदीमा हाम फालेर आत्महत्या गरेका छन् ।

२३ गते राति घरबाट बेपत्ता भएकी सुखी बडुवाल, उनका ३ छोरी र १ छोराले सामूहिक रुपमा कर्णाली नदीमा हाम फालेर आत्महत्या गरेको जिल्ला प्रहरी कार्यालय दैलेखले जानकारी दिएको छ ।

बेपत्ता भएका मध्ये दुई छोरी १५ बर्षीया कल्पना बडुवाल र १२ बर्षीया सरिता बडुवालको हात बाँधेको अवस्थामा २४ गते सोमबार साँझ कर्णाली नदीमा शव फेला परेको थियो भने आमा सुखी बडुवाल र ८ बर्षिय छोरा ललित बडुवालको शव मङ्गलवार दिउँसो कर्णाली नदीमा फेला परेको छ ।

५ बर्षिया रजनी बडुवालको खोजी तीव्र पारिएको जिल्ला प्रशासन कार्यालय दैलेखका सहायक प्रमुख जिल्ला अधिकारी हरि देवकोटाले जानकारी दिनुभएको छ ।

अहिले घटनास्थलमा दैलेखका प्रमुख जिल्ला अधिकारी हरि प्याकुरेल, दैलेखका प्रहरी प्रमुख अनुपम श्रेष्ठ र सुर्खेतका प्रहरी प्रमुख डिआइजी बसन्त पन्त र गोताखोरको टोली समेत पुगिसकेको छ । खोजी कार्य तीव्र पारिएको छ ।

सनाखत भएका ४ जनाको शव पोस्टमार्टमका लागि अछामको मङ्गलसेन लगिएको दैलेखका प्रहरी प्रमुख अनुपम श्रेष्ठले जानकारी दिनुभएको छ ।

घर मुली मानसिंह बडुवालले श्रीमतीसहित सबै परिवारलाई मदिरा सेवन गरेर लगातार तनाव दिएपछि २३ गते साँझ नै ४ जना केटाकेटी सहित सुखी बडुवाल घरबाट निस्किएको स्थानीयले बताएका छन् ।

गरिब परिवार भएकोले एउटा समस्या थियो तर मदिरा सेवनसँगै लगातार घर मुलीले तनाव दिएपछि पाँच जना नदिमा हाम फाल्नुपर्ने अवस्था आएको प्रारम्भिक अनुसन्धानले देखाएको प्रहरीले जनाएको छ ।

घरमुली मानसिंह बडुवाललाई प्रहरीले पक्राउ गरेर राकम कर्णाली प्रहरी चौकीमा अनुसन्धान गरिरहेको छ ।

घरेलु हिंसाकै कारण नाबालकले समेत अनाहकमै ज्यान गुमाउनु परेको विषयलाई लिएर अधिकारकर्मीहरूले विरोध जनाएका छन् ।

तीनै तहका सरकारहरूले वडा तहसम्मका नागरिकहरूको समस्या के, छ कसरी बसेका छन्, घरेलु मदिराको बिक्री कस्तो छ र  समस्यामा परेका महिला र बालवालिकाहरुको अवस्थासमेत तत्काल चित्रण गरेर आगामी दिनहरूमा यस्ता घटनाहरू घट्न नदिने वातावरण तयार गर्न आग्रह गरेका छन् ।।