कोरोनाबाट नेपालमा थप तीन जनाको मृत्यु

काठमाडौं– कोरोना संक्रमणबाट गएको २४ घण्टामा नेपालमा थप ३ जनाको मृत्यु भएको छ । यो सँगै कूल मृतक संख्या ३ हजार २७ पुगेको स्वास्थ्य मन्त्रालयले जनाएको छ ।

पछिल्लो २४ घण्टामा ८५ जना नयाँ संक्रमित थपिएका छन् । मन्त्रालयका अनुसार बितेको २४ घण्टामा ९३ जना भने संक्रमणमुक्त भएका छन् । अहिले १२ सय ८८ जना सक्रिय संक्रमित भै आइसोलेसनमा रहेको मन्त्रालयको तथ्याङ्क छ । ५९ जना भने क्वारेन्टिनमा छन् ।

यसैबीच कोरोना भाइरसको संक्रमणको जोखिम बढेको भन्दै स्वास्थ्य तथा जनसंख्या मन्त्रालयले सजगताका साथ होली पर्व मनाउन आग्रह गरेको छ । कोरोना संक्रमणको दर उकालो लाग्दैछ भन्दै मन्त्रालयले आफ्नै परिवारमा सीमित भएर पर्व मनाउन, होलीमा हुल तथा ठूला जमघटबाट टाढा बस्न मन्त्रालयले अपिल गरेको छ ।

कोरोना संक्रमणको जोखिम हुलहरुमै बढी हुन्छ भन्दै मन्त्रालयले कोरोनालाई फैलिन नदिन पनि आह्वान गरेको छ ।