एक क्विन्टल गाँजासहित तीन पक्राउ

हेटौंडा– जिल्ला प्रहरी कार्यलय मकवानपुरले १ क्विन्टल गाँजासहित तीन जनालाई पक्राउ गरेको छ।

जिल्ला प्रहरी कार्यलयबाट खटिएको विशेष टोलीले त्रिभूवन राजपथ अन्तर्गत हेटौंडा उपमहानगरपालिका वार्ड न १ मा नामटारबाट हेटौंडा तर्फ आइरहेको ना २ ख ९८६२ नम्बरको ट्रकलाई रोकी चेक जाँच गर्दा उक्त लागू औषध गाँजा बरामद भएको हो । गाँजा बरामदपछि चालक काभ्रेपलाञ्चोक जिल्ला, महाभारत गाउपालिका- ९ बस्ने वर्ष ४९ का आइतबहादुर ठाडामगर पक्राउ परेका थिए । गाँजालाई ट्रक क्याबिनको माथि भाग हुटमा फल्स बटम बनाइ १७ वटा पोकामा ल्याइरहेको अवस्थामा फेला परेको थियो।

सोमबार बिहान ५:४५ को समयमा पक्राउ परेका चालक ठाडामगरको प्रारम्भिक अनुसन्धानबाट सोही दिन दिउँसो १:०० बजे यही कार्यमा सग्लग्न जिल्ला मकवानपुर भीमफेदी गाउँपालिका ९ बस्ने वर्ष ४१ को ऐक्ला भन्ने राजकुमार तामाङ र कैलाश गाउँपालिका वार्ड न १० बस्ने वर्ष ३६ को सविन भन्ने सुविन रुम्बा पक्राउ परेका छन् । ट्रक नियन्त्रणमा लिई तीनै जना उपर आवश्यक अनुसन्धान भइरहेको जिल्ला प्रहरी कार्यलय मकवानपुरका प्रहरी नायब उपरीक्षक जयश्वर रिमालले जानकारी दिनुभयो ।