प्रधानमन्त्रीद्वारा मन्त्रिपरिषद् हेरफेर, तीन उपप्रधानमन्त्री, चार मन्त्री पुरानै

काठमाडौं– प्रधानमन्त्री केपी शर्मा ओलीले मन्त्रिपरिषद् हेरफेर गर्नुभएको छ । नवनियुक्त मन्त्रीहरुले शुक्रबार साँझ नै शपथ लिनुभएको छ ।

जनता समाजवादी पार्टी (जसपा) ८ मन्त्री र दुई राज्यमन्त्रीसहित सरकारमा सामेल भएको छ । मन्त्रिपरिषदमा तीन उपप्रधानमन्त्री हुनुभएको छ । विष्णुप्रसाद पौडेल उपप्रधानमन्त्री र अर्थ, रघुवीर महासेठ उपप्रधानमन्त्री र परराष्ट्र तथा राजेन्द्र महतो उपप्रधानमन्त्री र सहरी विकास मन्त्री नियुक्त हुनुभएको छ ।

सरकारमा उपप्रधान तथा अर्थमन्त्री पौडेलसहित शिक्षा, विज्ञान तथा प्रविधिमन्त्री कृष्णगोपाल श्रेष्ठ, भौतिक पूर्वाधार तथा यातायातमन्त्री वसन्तकुमार तामाङ तथा कानून, न्याय तथा संसदीय मामिलामन्त्री लीलानाथ श्रेष्ठले निरन्तरता पाउनुभएको छ ।

स्वास्थ्य तथा जनसङ्ख्या मन्त्रीमा शेरबहादुर तामाङ नियुक्त हुनुभएको छ ।

जसपाबाट शरतसिंह भण्डारी ऊर्जा, जलस्रोत तथा सिँचाइ मन्त्री, अनिलकुमार झा खानेपानी, लक्ष्मणलाल कर्ण भूमि व्यवस्था, सहकारी तथा गरिबी निवारण, विमलप्रसाद श्रीवास्तव श्रम, रोजगार तथा सामाजिक सुरक्षा, उमाशंकर अरगरिया, संस्कृति, पर्यटन तथा नागरिक उड्डयन, चन्दा चौधरी महिला, बालबालिका तथा ज्येष्ठ नागरिक, एकवाल मियाँ युवा तथा खेलकुद मन्त्री नियुक्त हुनुभएको छ ।

सरकारमा चन्द्रकान्त चौधरी ऊर्जा, जलस्रोत तथा सिँचाइमन्त्री तथा रेणुका गुरूङ महिला, बालबालिका तथा ज्येष्ठ नागरिक मन्त्री नियुक्त हुनुभएको छ ।