प्रतिनिधिसभा विघटन विवाद : संवैधानिक इजलासमा सुनुवाइ आजपनि

काठमाडौँ-    प्रतिनिधिसभा विघटन विवादमा सर्वोच्च अदालतको संवैधानिक इजलासमा भैरहेको सुनुवाइ आजपनि जारी रहने भएको छ ।

हिजोको बहसमा सहभागी सरकारी वकिलहरुले विघटन सही भएको जिकीर गर्नु भएको छ ।

नायव महान्यायाधिवक्ता पद्मप्रसाद पाण्डेयले नेपालको संविधानअनुसार प्रधानमन्त्री नियुक्तिका लागि आधार नदेखिएपछि राष्ट्रपतिले प्रतिनिधिसभा विघटन गर्नुपरेको बताउनुभयो ।

प्रधानन्यायाधीश चोलेन्द्रशम्शेर जबरा, वरिष्ठतम न्यायाधीश दीपककुमार कार्की, मीरा खड्का, ईश्वरप्रसाद खतिवडा र डा आनन्दमोहन भट्टराईको संवैधानिक इजलासमा प्रतिनिधिसभा विघटनसम्बन्धी मुद्दाको सुनुवाईका क्रममा सरकारी पक्षबाट बहस गर्दै उहाँले प्रधानमन्त्रीका लागि प्रधानमन्त्री केपीशर्मा ओली र नेपाली कांग्रेसका सभापति शेरबहादुर देउवा दुवैको आधार स्पष्ट नभएपछि संविधानअनुसार विघटन गरिएको तर्क गर्नुभयो ।

बहसको क्रममा प्रधानन्यायाधीशले राणाले प्रश्न गर्दै नेपालको संविधानको धारा ७६ (५)को प्रक्रिया पूरा नगरेकाले प्रश्न उठेको हो, विकल्प खोज्नु पर्ने थिएन र ? भनी प्रश्न गर्नु भयो । जावफमा नायव महान्यायाधिवक्ता पाण्डेयले देउवा र ओली दुवैको प्रधानमन्त्री बन्ने आधार नदेखेपछि राष्ट्रपतिले अस्वीकार गर्नुभएको हो र यो विषयलाई अदालतले हेर्न पनि मिल्दैन भन्नुभयो ।

प्रधानन्यायाधीश राणाले पुनःप्रश्न गर्नुभयो, “कुनै दुईमध्ये एकलाई नगर्दा यो अवस्था आएको हो कि हैन ? भारतलगायत देशमा के अभ्यास छ ?”

जवाफमा नायब महान्यायाधिवक्ता पाण्डेयले भारतमा पनि पटकपटक संसद् विघटन भएको र संसद् विघटनपछि सरकार स्थिर भएको चर्चा गर्नुभयो ।

उहाँले प्रतिनिसभा पुनःस्थापना भएमा झनै समस्या सिर्जना हुने तर्क गर्नुभयो । विगतमा पुनःस्थापना भएपछि राजनीतिक अवस्था झन बिग्रीएको र अहिले पुनःस्थापना भएमा झन् ठूलो समस्या हुने बताउनुभयो ।

न्यायाधीश इश्वरप्रसाख खतिवडाले अदालतकै कारण राजनीतिक अस्थिरता भएको हो भनी प्रश्न गर्दा सरकारी वकिल पाण्डेयले अदालत पनि राजनीतिक अस्थिरताको कारण भएको उत्तर दिनुभयो ।।