मुद्दा फर्स्यौटका आधारमा जिल्ला अदालत गोरखा दोश्रो उत्कृष्ट

गोरखा- मुद्दा फैसलाको संख्याका आधारमा जिल्ला अदालत गोरखा गण्डकी प्रदेशको उत्कृष्ट दोस्रो अदालतमा पर्न सफल भएको छ ।

गत आर्थिक बर्षभर गरिएको मुद्धाको फैसला संख्याका आधारमा जिल्ला अदालत गोरखा प्रदेश भरका ११ जिल्लामध्ये उत्कृष्ट दोस्रोमा पर्न सफल भएको हो ।

गत आर्थिक बर्ष कुल ७ सय २८ मुद्दामध्ये ४ सय २३ मुद्दा फर्स्यौट गरिएको जिल्ला अदालतका तहसिलदार अमृत मिश्रले बताउनुभयो । जिम्मेवारीमा रहेका जम्मा मुद्दामध्ये ५८.०२ प्रतिशत मुद्दा फर्स्यौट भएको उहाँको भनाइ छ । गत आर्थिक बर्ष ४ सय १५ नयाँ मुद्दा दर्ता भएका थिए भने अघिल्लो बर्षबाट ३ सय १३ मुद्दा जिम्मेवारी सरेर आएको थियो ।

निषेधाज्ञाको समयमा पनि बालबालीका सम्बन्धी र थुनुवा सम्बन्धी मुद्दामा फैसलालाई निरन्तरता दिईएकाले उक्त प्रगती हासील गर्न सफल भएको मिश्रको भनाइ छ ।

जिल्ला अदालत गोरखामा हाल ३ सय ५ मुद्दा विचाराधिन छन् । अदालतमा दर्ता भएकामध्ये करीब आधा सम्बन्ध विच्छेदका रहेका छन् । गतबर्ष जिम्मेवारीमा रहेका ७ सय २८ मध्ये ३ सय ५१ सम्बन्ध विच्छेदका मुद्दा थिए । त्यसमध्ये २ सय ५२ को फर्छौट गरिएको छ । सम्बन्ध विच्छेदका मात्र ७२ प्रतिशत मुद्दा किनारा लगाइएको तहसिलदार मिश्रले बताउनुभयो ।।