काँग्रेस प्रदेश अधिवेशन : कर्णालीमा ललितजंग शाही र गण्डकीमा शुक्रराज शर्मा सभापतिमा विजयी

काठमाडौँ- नेपाली काँग्रेसको प्रदेश अधिवेशनका लागि भएको मतदानको मतगणना अन्तर्गत ३ प्रदेशको नतिजा सार्वजनिक भैसकेको छ ।

प्राप्त नतिजा अनुसार वागमती प्रदेश सभापतिका तीन जना प्रत्यासी मध्ये कसैले पनि ५१ प्रतिशत मत प्राप्त नगरेकाले पुन दोश्रो चरणको निर्वाचन हुने भएको छ ।

दोश्रो चरणको निर्वाचनमा दुइ मुख्य प्रतिस्पर्धी इन्द्र वानियाँ र जगदिश्वर नरसिंह केसीविच पुन: निर्वाचन हुने भएको हो ।

यसैगरी कर्णाली प्रदेश सभापतिमा ललितजंग शाही विजयी हुनु भएको छ । विजयी शाहिले प्रतिद्वन्द्वी भुपेन्द्रजंग शाहीलाई ९१ मतान्तरले पराजित गर्नु भएको हो । ललितजंग शाहीले  ४ सय २२ मत ल्याउँदा भुपेन्द्रले ३ सय ७१ मत प्राप्त गर्नुभयो ।

यस्तै गणडकी प्रदेशको सभापतिमा शुक्रराज शर्मा विजयी हुनुभएको छ ।

आफ्ना प्रतिस्पर्धी अर्जुन जोशीलाई उछिन्दै शर्मा विजयी हुनुभएको हो ।

सुदूरपश्चिममा जारी मतगणनामा वीरबहादुर बलायरको सुरुवातदेखि नै लिएको अग्रता कायमै छ । ५ सय मतगणना गर्दा सभापतिका उम्मेदवार बलायर र नारायणदत्त मिश्रबीचको मतान्तर १९३ पुगेको छ ।

प्रदेश १ को मतगणना शुरु गर्ने तयारी भैरहेको छ । उता लुम्बिनी प्रदेशमा पनि मतगणना जारी छ ।

सभापतिमा भरत कुमार शाह र अमरसिंह पुनविच प्रतिष्पर्धा भइरहेको छ । नेपाली कांग्रेको १४ औ महाधिवेशन अन्तरगत हिजो ६ वटा प्रदेशमा प्रदेश अधिवेशनको लागि मतदान सम्पन्न भएको हो ।

अधिवेशनबाट प्रत्येक प्रदेशमा ८ जना निर्वाचित पदाधिकारी सहित क्रियाशील सदस्यताको अनुपातका आधारमा प्रदेश समिति चयन गर्ने छन् ।

प्रदेश नं २ का कतिपय स्थानमा भने वडा पालिका र क्षेत्रिय अधिवेशन कै चरणमा रहेकाले हाल प्रदेश अधिवेशन शुरु नभएको समितिले जनाएको छ । नेपाली कांग्रेसको १४ औं महाधिवेशन अन्तरगत हालसम्म ६१ जिल्लाको अधिवेशन सम्पन्न भएका छन् ।

बाँकी १६ जिल्लामा महाधिवेशनपछि मात्रै जिल्ला नेतृत्वका लागि निर्वाचन हुनेछ ।

यद्यपि सबैजसो क्षेत्रबाट महाधिवेशन प्रतिनिधिको भने टुंगो लागिसकेको छ । कांग्रेस केन्द्रीय महाधिवेशन आउदो २४ गते शुरु गर्ने कार्यतालिका रहेको छ।।