माओवादी महाधिवेशनः समूहगत छलफल जारी

काठमाडौं- नेकपा माओवादी केन्द्रको राजधानीमा जारी आठौँ राष्ट्रिय महाधिवेशनको बन्दशसत्र आज पनि जारी रहने कार्यक्रम छ ।

अधिकांश समूहले वैचारिक तथा राजनीतिक दस्तावेज र विधान मस्यौदामाथिको छलफल सकाएका छन् । बाँकी समूहले आज अपरान्ह १२ बजेभित्र छलफल सक्ने तयारी गरेका छन् । समूहगत छलफलका लागि दिनभर समय दिइएकोमा आज अपरान्ह १२ बजेसम्मको समय थप गरिएको हो ।

हिजो पार्टी अध्यक्ष पुष्पकमल दाहाल ‘प्रचण्ड’द्वारा प्रस्तुत ‘२१औँ शताब्दीको समाजवादको नेपाली बाटो’ शीर्षकको वैचारिक तथा राजनीतिक दस्तावेज र स्थायी कमिटी सदस्य देवप्रसाद गुरुङद्वारा प्रस्तुत विधान मस्यौदामा दिनभर समूहगत छलफल भएका थियो ।

समूहगत छलफल गरेका सबै समूहमा सहभागी प्रतिनिधिले अध्यक्ष दाहालद्वारा प्रस्तुत वैचारिक तथा राजनीतिक दस्तावेजमाथि समर्थन जनाउँदै विभिन्न सुझाव राखेको माओवादी केन्द्रले जनाएको छ ।

आज अपरान्ह १ बजेदेखि महाधिवेशनस्थल प्रज्ञा भवन, कमलादीमा समूहगत छलफलको निष्कर्ष प्रस्तुत गर्ने कार्यक्रम छ । समूहका प्रमुखले समूहगत छलफलको निष्कर्ष प्रस्तुत गर्नुहुनेछ । प्रत्येक समूह प्रमुखलाई प्रस्तुतीका लागि १५ मिनेटको समय दिइएको छ ।-