शाही, पौडेल र गुरुङ कांग्रेस केन्द्रीय सदस्य मनोनीत

काठमाडौं– नेपाली कांग्रेसका सभापति शेरबहादुर देउवाले थप केन्द्रीय सदस्य मनोनीत गर्नुभएको छ ।

शनिबारमात्रै वरिष्ठ नेता रामचन्द्र पौडेलसहित १० जना केन्द्रीय सदस्य मनोनयन गर्नुभएका सभापति देउवाले जीवनबहादुर शाही, प्रदीप पौडेल र कल्याणकुमार गुरुङलाई केन्द्रीय सदस्य मनोनीत गर्नुभएको छ ।

सभापति देउवाले नेपाली कांग्रेसको विधान, २०१७ (संशोधन सहित) को धारा २१ को उपधारा (१०) बमोजिम कांग्रेस केन्द्रीय कार्यसमितिको सदस्य पदमा मनोनयन गर्नु भएको केन्द्रीय कार्यालयका मुख्यसचिव कृष्णप्रसाद पौडेलद्वारा जारी विज्ञप्तीमा जनाइएको छ ।

१४ औं महाधिवेशनमा शाही सहमहामन्त्री, पौडेल महामन्त्री र गुरुङ सभापतिमा पराजित हुनुभएको थियो ।

यसैबीच नेपाली कांग्रेस केन्द्रीय कार्यसमितिको बैठक सोमबार दिउँसो २ बजे पार्टी केन्द्रीय कार्यालय, बी.पी. स्मृति भवन, ललितपुरमा बस्ने भएको छ ।