गोरखादेखि काठमाण्डौंसम्म नेपाली सेनाको पदयात्रा शुरु

गोरखा- पृथ्वी जयन्तीको अवसर पारेर नेपाली सेनाले गोरखादेखि काठमाण्डौंसम्म पदयात्रा शुरु गरेको छ । ऐतिहासिक महत्वको एकिकरण अभियानलाई हर्सोल्लासका साथ मनाउन गोरखादेखि काठमाण्डौंसम्मको ऐतिहासिक पदमार्गमा पदयात्रा शुरु गरिएको सेनाले जनाएको छ ।

नेपाली सेनाले दुई वर्षदेखि यही बाटो हुँदै काठमाण्डौंसम्म पदयात्रा गर्दै आएको छ । नेपाली सेनाको मध्यकमाण्ड हेडक्वाटरका कमाण्ड सेनापति उपरथी बाबुराम श्रेष्ठ र गोरखा नगरपालिकाका नगरप्रमुख राजनराज पन्तले नेपालको राष्ट्रिय झण्डा र टर्च हस्तान्तरण गरि पदयात्राको शुभारम्भ गर्नुभएको हो ।

गोरखा दरवारबाट शुरु भएको यात्रा धादिङ, नुवाकोट हुँदै पृथ्वीजयन्तीको दिन काठमाण्डौं पुग्ने गोरखास्थित रिपुमर्दन गणका सेनानी प्रकाश परियारले बताउनुभयो । पदयात्रामा वाजागाजा सहित पृथ्वीनारायण शाहकालीन नेपाली सेनाको पोशाकमा रिपुमर्दन गणको फौज सहभागी भएको छ ।

सो क्रममा टर्च सहितको नेपालको झण्डा सहित पृथ्वीनारायण शाहको पालामा स्थापना भएका सेनाका प्रथम पाँच कम्पनीका झण्डा पनि समावेश गरिएको सेनानी परियारले जानकारी दिनुभयो । पृथ्वीनारायण शाहको पालामा श्रीनाथ, कालिबक्स, पुरानो गोरख, बर्दवाणी र सबुज नाममा ५ कम्पनी स्थापना भएका थिए ।

तत्कालीन कम्पनीहरु अहिले पनि सेनाको गणका रुपमा रहेका छन् । पदयात्राका क्रममा गोरखाको टोलीले नेपाली सेनाको धादिङको टोलीलाई, धादिङले नुवाकोटको टोलीलाई र नुवाकोटमा तैनाथ नेपाली सेनाको टोलीले काठमाण्डौंमा तैनाथ गणलाई टर्च, राष्ट्रिय झण्डा र सेनाका ५ कम्पनीको झण्डा हस्तान्तरण गर्नेछ ।

काठमाण्डौंको गणले पृथ्वीजयन्तीको दिन काठमाण्डौंमा हुने कार्यक्रममा भाग लिने नेपाली सेनाले जनाएको छ । सरकारले गोरखादेखि काठमाण्डौंसम्मको पुरानो बाटोलाई एकिकरण पदमार्गका रुपमा विकास गर्न थालेको हो । सेनाले उक्त पदमार्गको अध्ययन पूरा गरेको छ ।

गोरखाबाट धादिङ, नुवाकोट हुँदै काठमाण्डौंबाट काभ्रेसम्मको करीव १ शय ९२ किलोमिटर बाटोलाई सरकारले एकिकरण पदमार्गको रुपमा प्रवद्र्धन गर्न लागेको हो । नेपाली सेनाको गोरखास्थित गणले भने गोरखाजिल्लाभित्रको बाटोको अध्ययन गरेको छ । गोरखा दरवारबाट पिपलथोक, ताप्लेकोट, अश्राङ हुँदै बोर्लाङघाटसम्मको बाटोको प्रारिम्भक अध्ययन गरि स्थानीय सरकारसँगको सहकार्यमा पदमार्ग सुधारको काम पनि शुरु गरिएको सेनाले जनाएको छ ।

काठमाण्डौंको हनुमानढोकाबाट गोरखा दरवार २६ कोषको दूरीमा रहेको छ । बाटोको विचविचमा रहेका अधिकाँश कोसेढुंगा हराएका छन् भने भएकाको पनि संरक्षण हुन सकेको छैन । एकिकरण पदमार्गमा पर्ने गोरखाखण्डमा ६ वटा कोसेढुंगा हुनुपर्नेमा ५ वटामात्रै सुरक्षित छन् । गोरखा दरवारको हनुमान भञ्ज्याङ, मेलबिसौना, ताप्लेकोट, अश्राङको ठाँटी र बोर्लाङको घाटवेसीको कोसेढुंगा सुरक्षित छन् । यस्तै पदमार्ग आसपास दर्जनौं ऐतिहासिक मठमन्दिर, गुम्बा, पाटीपौवा लगायतका पुरातात्विक सम्पदाहरु रहेका छन् । पदमार्गको धेरैजसो खण्डमा भने मध्यपहाडी लोकमार्ग निर्माण भैरहेको छ । जसका कारण ऐतिहासिक सम्पदा नासिने जोखिम पनि बढेको छ । पुरानो हुलाकी मार्गका रुपमा रहेको बाटो आसपासका पुराना चौताराहरुको पनि संरक्षण हुन सकेको छ्रैन ।

पदयात्रामा सहभागी सेनाको टोलीको बिदाई कार्यक्रममा बोल्दै नेपाली सेनाको मध्यकमाण्ड हेडक्वाटरका कमाण्ड सेनापति बाबुराम श्रेष्ठले पदमार्गमा पर्ने सम्पदाहरुको संरक्षणमा पनि सेना सहभागी भैरहेको बताउनुभयो । उहाँले राष्ट्रिय एकताको सन्देश दिन सेनाले पदयात्राको थालनी गरेको जानकारी दिनुभयो ।

गोरखा नगरपालिकाका प्रमुख राजनराज पन्तले त्यस्ता सम्पदाको संरक्षणमा नेपाली सेनालाई गोरखा, धादिङ, नुवाकोट र काठमाण्डौंका स्थानीय सरकारले साथ दिनुपर्ने बताउनुभयो । प्रमुख जिल्ला अधिकारी शंकरहरि आचार्यले एकिकरण पदमार्गमा पर्ने जिल्लाहरुविच त्यसको प्रचारप्रसारका लागि समन्वय हुनुपर्ने बताउनुभयो ।

पत्रकार महासंघ गोरखा शाखाका कोषाध्यक्ष मोहसिन अलि मियाँले नेपाली सेनाको यसप्रकारको अभियानले गोरखाको पर्यटन प्रवद्र्धनमा टेवा पुग्ने बताउनुभयो । कार्यक्रममा नेपाली सेनाको श्री नं ३ बाहिनी अड्डाका बाहिनीपति कुमारबाबु थापा, रिपुमर्दन गणका गणपति हेमराज विष्ट, गोरखाको विभिन्न पालिकाका जनप्रतिनिधि, कार्यालय प्रमुख लगायतको सहभागीता रहेको थियो ।।