नुवाकोटको तारुकामा गोरु जुधाउने मेला : प्रशासनले रोक्यो तर किसानहरुले टेरेनन्

नुवाकोट- नुवाकोट तारुकामा माघे संक्रान्तिमा आयोजना गरिने गोरु जुधाउने मेला कोरोनाका कारण औपचारिक रुपमा रोकिएपनि किसानहरु आफैंले  गोरु जुधाएर परम्परालाई निरन्तरता दिएका छन ।

स्पेनको वुल फाइटको झल्को दिने यो गोरु जुधाउने परम्परा धेरै पहिलेदेखि चल्दै आएको भन्दै किसानहरुले आफूहरुले परम्पराको विंडो थामेको बताए ।

नुवाकोटको गोरु जुधाइ मेला स्थगित भएपनि किसान आफैले चन्दनीको ठुलो वारीको पाटोमा गोरु ल्याएर जुधाए ।

गत वर्ष विजेता तथा उपविजेता गोरुधनीले पुरस्कार थाप्ने गरेको भएपनि यस पटक कसैले पनि गोरु जुधाई मेला औपचारिक रुपमा नगरेका कारण किसानले एकआपसमा गोरु जुधाएर परमपराको निरन्तरता र मनोरन्जनमात्रै लिएका छन् ।

सदियौंदेखि नुवाकोटकै पहिचानको रुपमा रहेको प्रसिद्ध गोरु जुधाई मेला कोरोनाको तेश्रो भेरियण्टका कारण रोकिएको हो । किसानहरुले तारुकाको चन्दनीमा भने आफैं गोरु जुधाएका हुन् ।

मेला सन्चालनको लामो अवधिमा पहिलो पटक गोरु जुधाई मेला रोकिएको थियो । स्थानीयवासीले आफैं जुटेर सामाजिक दुरी कायम गर्दै १५ हल गोरु जुधाएको तारुकाका युवा सामाजिक कार्यकर्ता दिपेश शाक्यले जानकारी दिए ।

गोरु जुधाई हेर्न नुवाकोटलगायत आसपासका सर्वसाधारण तारुकाको चन्दनी पुगेका थिए । स्वास्थ्य मापदण्डको पालना र सामाजिक दुरि पालना गर्दै यस वर्षको गोरु जुधाइ आयोजना गरिएको आयोजकको भनाइ छ ।

सदियौँदेखि प्रत्येक वर्षको माघे संक्रान्तिका दिन नुवाकोटको दक्षिणी भेगमा रहेको तारुका गोरु जुधाउने मेलाको रुपमा देशकै एकमात्र नमूना र पहिचानको रुपमा परिचित भइसकेको छ । सदरमुकाम विदुरदेखि ३० किलोमिटर दक्षिणपश्चिममा रहेको तारुकाको पर्यटकीय गाउँ चन्दनीमा किसानले आफैं मेलाको आयोजना गरेका थिए ।।