बेँसीशहर–चामे सडकखण्ड थप १० दिन बन्द

मनाङ- लमजुङ र मनाङ जोड्ने डुम्रे-बेँसीशहर–चामे सडक खण्ड पुनः १० दिन बन्द भएको छ । सडकखण्डको तिमाङ छहरामा रहेको काठे पुल जीर्ण भएकाले कल्भर्ट निर्माण कार्य सम्पन्न भैसकेको छ ।

कल्भर्टका ढलान पुर्णरुपमा सेट भइ नसकेका कारण आइतबार चैत ६ गतेदेखि पुनः सडक बन्द गरिएको जिल्ला प्रशासन कार्यालय मनाङले जनाएको छ । पैदल यात्रु बाहेक सवारी साधनका लागि सडक बन्द गरिएको हो ।

मनाङ जिल्ला प्रवेश गर्ने सडक मार्ग डुम्रे – बेसिशहर-चामे खण्डको तिमाङ छहरामा दुई वटा ठाउँमा कल्भर्ट पुलको स्लाब ढलान कार्य सम्पन्न भएको र प्राविधिक हिसाबले सेट हुन कम्तीमा १५ दिन लाग्ने भएकाले सो अवधिको लागि सडक बन्द गरिएको बेसिसहर- चामे सडक योजना कार्यालयले जनाएको छ ।
सडक यहि चैत १५ गतेसम्म बन्द रहने छ ।

सडक निर्माण लागि गत फागुन २० देखि चैत ५ गतेसम्मका लागि सडक बन्द गरिएको थियो ।

जिल्लाको नासोँ गाउँपालिका वडा नं ९ स्थित तिमाङ छहरामा दुई ठाउँमा कल्भर्ट निर्माण गरिएको छ ।

यहाँ गत असारमा आएको बाढीले काठेपुल बगाएको थियो । पछि पुनः काठेपुल राखेर यातायात सञ्चालनमा भएकोमा गत कात्तिकमा आएको बाढी पहिराले समेत काठेपुल बगाएको थियो ।

त्यसपछि राखिएको काठेपुल जीर्ण हुँदै गएको र आगामी बर्खायाममा फेरि समस्या उत्पन्न हुने भएकाले व्यवस्थित गर्न ढलानसहितको स्ल्याभ कल्भर्ट निर्माण गरिएको हो ।।