बाढीका कारण नारायणी पारीको सुस्ता डुबानमा

नवलपरासी- पश्चिम नवलपरासीको सुस्तामा नारायणी नदीको बाढि पसेको छ ।

नारायणी पारीको सुस्ता गाँउमा बाढिले ५ घर डुबाएको छ ।

सुस्ताको थारु टोलबाट बाढि बस्तीमा पस्न सुरु गरेको सुस्ता गाँउपालिकाका अध्यक्ष टेकनारायण उपाध्यायले बताउनुभयो ।

पानीको सतह निरन्तर बढ्ने क्रममा रहेकाले सुस्ता गाँउ जोखिममा परेको छ ।

पारी सुस्ताबाट नेपालतर्फ आउन डुंगा एक मात्र विकल्प हो तर अहिले बाढिको भेलमा डुंगा चल्न नसक्ने भएकाले नेपालतर्फबाट उद्धार गर्न पनि नसक्ने अवस्था रहेको छ ।

बाढि बढ्दै जाँदा भारततर्फ भाग्नुपर्ने अवस्था आएको सुस्ताका स्थानीय रविन्द्र यादवले बताउनुभयो ।

अहिले बाढि नियन्त्रणका लागि बनाइएको संरचना भत्काएर बाढि बस्तीमा पस्न सुरु गरेको छ ।

गण्डक बाँधमा अहिले प्रतिसेकेन्ड ४ लाख ४० हजार क्युसेक पानीको बहाव रहेको छ । पानीको बहाव निरन्तर बढ्ने क्रममा रहेको गण्डक बाँधका नेपाली सम्पर्क अधिकारी अमित खड्काले जानकारी दिनुभयो ।

बाँधको संरचना पुरानो र कमजोर भएकाले तिन लाख ६७ हजार क्यूसेक पानीको बहाव पुगेपछि खतराको तह मानिन्छ ।

पानीको बहाव बढ्न थालेपछि हिजो बिहानैबाट गण्डक बाँधका सबै ३६ ओटा ढोका खोलिएका छन । गण्डक बाँधका कारण पश्चिम नवलपरासीका दुई दर्जन बढि गाँउ डुबानको जोखिममा पर्दे आएका छन् ।।