सप्तरीबाट आठ सय किलो बढी गाँजा बरामद

सप्तरी- सप्तरी प्रहरीले ८ सय १० किलो तयारी अवस्थाको लागू औषध गाँजा बारामद गरेको छ । जिल्ला प्रहरी कार्यालय सप्तरीले पत्रकार सम्मेलन गरी बरामद गरिएको गाँजा सार्वजनकि गरेको छ ।

पहिला देखि नै यस ठाउँमा गाँजाको तस्करी भइरहेको थाहा पाएपछि प्रहरीको निगरानी बढाएको सप्तरी प्रहरीका प्रमुख अभिनारायण काफ्लेले बताउनुभयो ।

खाल्टो खनि बालुवामा गाडिएको अवस्थामा ठूलो परिमाणमा लागूऔषध गाँजा प्रहरीले बरामद गरेको हो । एक ठाउँमा १२ बोरा, दोस्रो ठाउँमा ९ बोरा र तेस्रो ठाउँमा ६ बोरा गरी २७ बोरा गाँजा बरामद भएको हो । एक बोरामा ३० किलो बराबरको गाँजा प्लाटिकमा प्याक गरी राखिएको थियो ।

जिल्लाको हनुमाननगर कंकालिनी नगरपालिका वडा नम्वर १ कोशी ब्यारेजको गोलघर देखि ५ सय मिटर उत्तर पूर्व कोशी भंगालको पूर्व टापुको एकान्त ठाउँमा बालुवामा खाल्टो खनि पुरी गाँजा राखिएको अवस्थमा बरामद गरेको जिल्ला प्रहरी कार्यालय सप्तरी एसपी काफ्लेले बताउनुभयो ।

पत्रकार सम्मेलनमा प्रहरी प्रमुख काफ्लेले बरामद गाँजा तस्करीको तरिका बिलकुलै नौलो पाइएको बताउनुभयो । उहाँले लामो समयदेखि गाँजा तथा लागुऔषध कारोबार भैरहेको हुन सक्ने देखिएकाले अनुसन्धान त्यसतर्फ केन्द्रीत गरिएको बताउनुभयो ।-