संखुवासभाका विभिन्न ठाउँमा आगलागी हुदाँ तीनवटा घर जलेर नष्ट

संखुवासभा- संखुवासभाको विभिन्न स्थानमा आगलागी हुदाँ तीनवटा घर जलेर नष्ट भएका छन् । आगलागीमा परेर खाँदबारी नगरपालिका दुई घर र मकालु गाउँपालिकामा एक घर जलेर नष्ट भएका हुन् । आगलागीबाट तीन घरसहित लाखौं रुपैयाँ बराबरको धनमाल जलेर नष्ट भएको प्रहरीले जनाएको छ ।

गएराति अन्दाजी १० बजेतिर आगलागी हुँदा मकालु गाउँपालिका–१ का पेमा खङदु शेर्पा र खाँदबारी नगरपालिका–४ स्थित भ्याङखोलाका पवित्रा गुरुङ, पर्शुराम दर्जीको घर जलेर नष्ट भएको जिल्ला प्रहरी कार्यालय संखुवासभाका प्रहरी निरिक्षक सरोज खनालले जानकारी दिनुभयो ।

आगलागीबाट मकालु गाउँपालिका–१ का शेर्पाको नगद १७ लाख, १५ तोला सुन र पाँच सय तोला चाँदी समेत जलेर नष्ट भएको प्रहरी निरिक्षक खनालले बताउनुभयो ।

मकालु –१ का शेपाको घरमा खाना पकाउनु चुलाबाट आगो फैलिएको थियो । त्यस्तै गरी आगलागीबाट खाँदबारी –४ की गुरुङको १६ लाख रुपैयाँ र दर्जीको १० लाख बराबरको भन्दा बढीको क्षति भएको प्रहरीले जनाएको छ ।

आगो परालबाट सल्किएको थियो । आगो स्थानीयको सक्रियतामा केही समयपछि आगो नियन्त्रणमा लिइएको थियो । आगलागीबाट गुरुङको दुईवटा घरमध्ये एउटा घर पूर्ण रूपमा क्षतिग्रस्त भएको छ । यसैगरी दर्जीको ढुंगा, माटो र खरले छाएको तीनतले घर पूर्ण रूपमा क्षतिग्रस्त भएको छ ।-