धनुषामा टिपरले ठक्कर दिंदा बालकको मृत्यु, एक बालिका गम्भीर घाइते

धनुषा- धनुषामा ग्राभेल लोड रहेको तिव्र गतिको टिपरले ठक्कर दिँदा एक बालकको मृत्यु भएको छ भने एक बालिका गम्भीर घाइते भएकी छन् ।

जिल्लाको सबैला नगरपालिका वडा नम्बर–१२ रघुनाथपुर सिर्काटोलस्थित पोखरी नजिक प्रदेश–२–०३–००१ क. १६२१ नम्बरको टिपरले ठक्कर दिँदा सोही ठाउँ बस्ने धिरेन्द्र कुमार दनुवारका ७ वर्षीय छोरा रियान्स कुमारको मृत्यु भएको हो ।

टिपरको ठक्करबाट सोही ठाउँ बस्ने बिरेन्द्र दनुवारकी ५ वर्षीया छोरी राधी कुमारी दनुवार गम्भीर घाइते भएकी छन् विद्यालयमा छुट्टी भएपछि घर फर्किरहेका दुबैजनालाई तिव्र गतिमा रहेको सो टिपरले ठक्कर दिएको जिल्ला प्रहरी कार्यालय धनुषाले जनाएको छ ।

बरमझियाबाट रघुनाथपुरतर्फ जाँदै गरेको तीव्र गतिको उक्त टिपर अनियन्त्रित भई दुबै बालबालिकालाई ठक्कर दिएको स्थानीयले बताएका छन् ।

घटनास्थलमा उपस्थित स्थानीयले बाटो अवरुद्ध गरि चक्काजाम गरेको र सो क्रममा स्थानीय र प्रहरीबीच झडप हुँदा प्रहरीले भीडलाई नियन्त्रणमा लिन एक राउण्ड हवाई फायरसमेत गरेको थियो ।

स्थानीयले बोतलमा पेट्रोल राखी प्रहरीमाथी प्रहार गरेकोले स्थितिलाई नियन्त्रणमा लिनका लागि हवाई फायर गर्नुपरेको जिल्ला प्रहरी कार्यालय धनुषाले जनाएको छ ।