जब्दीमा नयाँ पुलका लागि टेण्डर गरिने
काठमाडौँ- बर्दियाको सदरमुकाम गुलरिया र बारबर्दिया जोड्ने जब्दी पुल भत्किएपछि सरकारले नयाँ टेन्डर प्रक्रिया थाल्ने भएको छ ।
पुरानै ठाउँमा भने पुल नबन्ने भौतिक पूर्वाधार तथा यातायात मन्त्री प्रकाश ज्वालाले बताउनुभयो ।
मन्त्रालयको आयोजनामा बुधबार भएको पत्रकार सम्मेलनमा मन्त्री ज्वालाले भत्किएको पुलका सम्बन्धमा अदालतमा मुद्दा चलिरहेको र अख्तियारले पनि अनुसन्धान सकाएर विशेषमा मुद्दा चलाइसकेकोले अब नयाँ कहाँ र कसरी बनाउने भनेर ठेक्का प्रक्रिया अगाडि बढाउने तयारीमा रहेको बताउनुभयो ।
उहाँले यसका लागि अर्थ मन्त्रालयबाट बजेट सुनिश्चितता गरिदिन आफूले पहल थालिसकेको जानकारी दिनुभयो ।
मन्त्रालयले अहिले भत्किएको पुलको संरचना हटाउन थालिसकेको जानकारी दिनुहुँदै उहाँले दुईवटा एक्जाभेटर लगेर संरचना हटाउन थालिएको बताउनुभयो ।
यसअघि २०७४ साउन २८ गते बबई नदिमा आएको बाढीका कारण १६ करोड ६८ लाख रुपियाँ लगानीमा बनेको ४२५ मिटर लम्बाईको उक्त पुलका तीनवटा स्पान भासिएका थिए । उक्त पुलको ठेक्का पप्पु कन्ट्रक्सनले पाएको थियो ।
पुल निर्माण लगायत माग राखेर नेपाली कांग्रेसका संघीय सांसद सञ्जय गौतम आमरण अनशनमा बस्नुभएको छ ।
मन्त्री ज्वालाले गौतमलाई अनशन तोड्न आग्रह गर्नुभयो ।
भत्किएको पुलका स्ल्याब र पिलरका कारणले बबई नदीको धार परिवर्तन भएर अन्य क्षेत्रमा समेत खतरा निम्तने देखिएपछि संरचाना हटाउनुपर्ने भएकाले त्यसक्षेत्रमा अनसन तोड्न मन्त्री ज्वालाले गौतमलाई आग्रह गर्नुभएको हो ।।
प्रतिक्रिया राख्नुहोस्