धादिङको मलेखुमा भएको सवारी दूर्घटनामा एकजनाको मृत्यु, एकजना घाइते

धादिङ- पृथ्वी राजमार्गस्थित बेनीघाट रोराङ्ग गाउँपालिकाको मलेखु नजिकै भएको सवारी दुर्घटनामा परी एक जनाको मृत्यु भएको छ भने अर्का एक जना घाईते भएका छन् ।

काठमाडौबाट मुग्लिङतर्फ आउँदै गरेको ट्रक र विपरित दिशामा जाँदै गरेको बागमती प्रदेश ०२-०३७ प ७७३१ नं. को मोटरसाइकल बेनिघाट रोराङ गाउँपालिका वडा न ३, मलेखुस्थित रातमाटे भन्ने स्थानमा एक आपसमा ठक्कर खाँदा सो दुर्घटना भएको हो ।

दुर्घटनामा परी मृत्यु हुनेमा मोटर साईकल चालक विरगंज निवासी २५ वर्षीय कृष्ण श्रीवास्तव रहेको प्रहरीले जानकारी दिएको छ ।

यसैगरी सोही मोटर साईकलमा सवार २१ वर्षीय अस्मीता पाठक घाईते भएकी छिन् । अस्मीता लम्जुङ्ग निवासी हुने भने उनिहरु दुबै लम्जुङ्गबाट काठमाण्डौतर्फ जाँदै गरेको जिल्ला ट्राफिक प्रहरी कार्यालय गजुरीका प्रमुख उद्दव पोख्रेलले जानकारी दिनुभएको छ ।

घाईते अस्मिताको पाठकको स्थानीय अस्पतालमा उपचार भईरहेको छ भने ट्रक चालकलाई प्रहरी नियन्त्रणमा राखिएको छ ।