तीन महिनापछि रेसुङ्गा बिमानस्थलबाट नियमित उडान
भाडा भने बढ्यो
![](https://nepaltvonline.com/wp-content/uploads/2023/09/377107418_2986937188103882_7073854783515193108_n.jpg)
गुल्मी- गुल्मी जिल्लाको रेसुङ्गा विमानस्थलबाट तीन महिनापछि नियमित उडान सुरु भएको छ ।
मौसम खराबको कारण गत जेठको अन्तिम साताबाट उडान अबरुद्ध हुँदै आएको थियो । मौसममा सुधार आएसँगै शुक्रबार नेपाल एयरलाइन्सको विमानले उडान गरेको नेपाल एयरलाइन्स रेसुङ्गा स्टेशन इन्चार्ज थापाले जानकारी दिनुभयो ।
आज काठमाडौंबाट गुल्मीको उडान भर्ने ११ जना यात्रु थिए । रेसुङ्गाबाट काठमाडौंका लागि मात्रै तीन जना यात्रु थिए ।
मौसम खराबीले पटक पटक विमान उडान नभएपछि यात्रुमा विश्वास घट्दै गएको थियो । अब मौसम हेरेर हप्ताको एक दिन शुक्रबार उडान गर्ने थापाले बताउनुभयो ।
नागरिक उड्डयन प्राधिकरणले हप्ताको दुई दिन उडान गर्न अनुमति दिएको छ । रेसुङ्गा विमानस्थलका लागि काठमाडौंबाट ६ बजेर ३० मिनेटमा उडान गर्ने गर्दछ । रेसुङ्गा विमानस्थलबाट काठमाडौंका लागि बिहाज ७ बजेर ४५ मिनेट जाँदा उडान गर्ने समय तालिका रहेको छ ।
पछिल्लो समय सरकारले भाडा दर बढाएसँगै भाडादर वृद्धि भएको छ । रेसुङ्गादेखि काठमाडौंका लागि ७ हजार ८० रुपैयाँ र काठमाडौंदेखी रेसुङ्गा ७ हजार २ सय ८० रुपैयाँ भाडादर कायम गरिएको रेसुङ्गा स्टेशन इन्चार्ज थापाले बताउनुभयो ।
रेसुङ्गा विमानस्थलबाट गत बैशाखको अन्तिम सातादेखि व्यावसायिक उडान शुरु भएको थियो । यस एअरलाइन्समा (भिएफआर) सिस्टमबाट उडान हुने गरेको छ ।
रेसुङ्गा विमानस्थलमा बिहानी समयमा मात्रै उडानको लागि उपयुक्त हुने प्राधिकको निष्कर्ष रहेको छ । विमानस्थलबाट १८ सिट क्षमताको जहाजले उडान गर्ने गर्दछ । काठमाडौंबाट रेसुङ्गा विमानस्थल सम्म ५० मिनेटको उडान समय रहेको छ ।
विमानस्थलबाट नियमित जहाज चल्दा टिकट पाउनै मुस्किल पर्ने गरेको थियो । १५ जनाको टिकटका लागि करिब ६० जना सम्मको माग थियो । रेसुङ्गा विमानस्थल रेसुङ्गा नगरपालिकाको वडानम्बर–१० को सिमिचौरमा पर्दछ ।
जिल्ला सदरमुकाम तम्घासबाट करिव ५ मिलोमिटर कच्चिबाटोहुँदै विमानस्थल पुग्न सकिन्छ ।
अहिले गुल्मीबाट काठमाडौंसम्म गाडीको यात्रा झण्डै १३ देखि २२ घण्टासम्म यात्रा गर्नुपर्ने अवस्थामा रहेको छ ।
वर्षातको समयमा त झनै कष्टपूर्ण यात्रा गर्नुपर्ने अवस्था यहाँका स्थानीयलाई छ ।।
प्रतिक्रिया राख्नुहोस्