इजरायल घटना: छोराको मृत्युको खबरले शोकमा डुबेको छ धामी र विष्टको परिवार

दार्चुला- सुदुरपश्चिम विश्वविद्यालय अन्तरगत कृषि क्षेत्रको ‘लर्न एण्ड अर्न’ कार्यक्रम अन्तरगत इजराएल गएका दार्चुला जिल्ला मालिकार्जुन गाउँपालिका वडा नम्बर ४ हुनैनाथका लोकेन्द्र सिंह धामी र लेकम गाउँपालिका वडा नम्बर ५ रिठाचौपाताका दिपेश राज विष्टको निधन भएपछि परिवारजनमा सन्नाटा छाएको छ ।

चाडपर्वको बेला परिवारले छोरा गुमाउनु पर्दा लोकेन्द्र सिह धामीको परिवारमा सन्नाटा छाएको छ । लोकेन्द्र सिंह धामीको घरमा हजुरआमा, आमाबुवा, श्रीमती चार बर्षको छोरी र डेढ बर्षको छोरा छन ।

२०५७ सालमा जन्मिएका लोकेन्द्र सिंह धामीले लेकम गाउँपालिकामा रहेको लटिनाथ मावि चन्दनपुर चौपाताबाट आईएससी एजी पढेर विएससी एजी पढ्न सुदुरपश्चिम विश्वविद्यालयको कृषि क्याम्पस टिकापुरमा अध्ययनरत थिए ।

२०८० भाद्र २५ गते थप पढाइका लागि इजरायल गएका लोकेन्द्रको परिवारमा खुसी छाएको थियो । तर आइतबार एक्कासी छोराको मृत्युको खबर सुन्दा परिवार तथा गाउँ नै शोकमा डुबेको छ ।

उता लेकम गाउँपालिका वडा नम्बर ५ रिठाचौपाताका दिपेश विष्टका बुवा अशोकराज विष्टको २० बर्ष पहिले नै निधन भएको थियो । आमा पार्वती विष्टले छोराहरुको पालन पोषण गरी हुर्काएकी हुन् उनलाई ।

दिपेशको परिवार कञ्चनपुर जिल्लामा पनि बस्छन् । दिपेशको परिवारमा हजुरवुवा, हजुरआमा, आमा, र एक भाइ छन् । छोराको मृत्युको खबर सुनेपछि पहाडमा बस्दै आएका हजुरबुवा र आमा सोमबार विहानै कञ्चनपुर झरेका छन् ।

छोराको मृत्युको खबर सुनेपछि दिपेशकी आमा बेहोस भएकी छन । उनको उपचार कञ्चनपुरमा भइरहेको पारिवारिक श्रोतले जानाएको छ ।।