विद्यालयमा प्रधानाध्यापकको मृत्यु प्रकरण : मिर्चैयामा पूर्व-पश्चिम राजमार्ग अवरुद्ध

सिरहा- सिराहाको गोलबजार नगरपालिका- ३ जमदहमा रहेको सरस्वती माध्यमिक विद्यालयमा मृत भेटिएका प्रधानाध्यापक सञ्जीवकुमार साहको हत्या भएको भन्दै परिवारजन र स्थानीयले विरोधमा पूर्व-पश्चिम राजमार्ग अवरुद्ध गरेका छन् ।

स्थानीय र परिवारजनले सिराहाको मिर्चैया बजारको कटारीचोकमा घटनाको छानबिन र दोषीलाई कारबाहीको मागसहित प्रदर्शन गरेका हुन् ।

पूर्व-पश्चिम राजमार्ग अवरुद्ध गरी विरोध भएसँगै सयौँ सवारीसाधन अलपत्र परेका छन् । प्रहरीले अवरुद्ध राजमार्ग खुलाउन पीडित परिवार र स्थानीयसँग समन्वय गरिरहेको छ ।

घटना के हो ?

गोलबजार नगरपालिका- ३ जमदहस्थित सरस्वती माध्यमिक विद्यालयको निर्माणाधीन भवनको तेस्रो तल्लामा प्रअ साह आइतबार झुन्डिएको अवस्थामा फेला परेका थिए ।

विद्यालयका सहयोगीलाई उनले रिचार्ज कार्ड किन्न पठाएका थिए । सहयोगी फर्किएसँगै प्रअलाई खोजतलास गर्दा झुन्डिएको अवस्थामा भेटेपछि प्रहरीलाई खबर गरेका थिए । उनको दुवै खुट्टा भुइँमा छोएको बताइएको छ। घटनाबारे प्रहरीले अनुसन्धान गरिरहेको छ ।

पत्नीद्वारा आत्मदाहको चेतावनी

प्रअ साहकी पत्नी मीनाकुमारी साह राजमार्गमै सुतेर घटनाको निष्पक्ष छानबिन गरी हत्यारालाई कारबाही नगरिए ‘आत्मदाह’को चेतावनी दिएकी छिन् ।

विद्यालय व्यवस्थापन समिति गठन भएदेखि श्रीमानलाई बढी प्रेसर थपिएको भन्दै उनले समितिले कुनै काम गर्न नदिएको बताएकी छिन् । व्यवस्थापन समितिको दबाबका कारण सरुवा हुन खोजे पनि हुन नदिएको उनको भनाइ छ ।