मनाङमा भारी हिमपात, जनजीवन कष्टकर

नविन अंकुर, मनाङ १८ मंसिर, १९:३५

मनाङ- देशैभर मौसम प्रतिकूल बनेसँगै विकट जिल्ला मनाङमा भारी हिमपात भएको छ ।

यस समयलाई मनाङमा हिमपात हुने अनुकूल समय मानिन्छ । कात्तिक अन्तिम सातादेखि मङ्सिरको पहिलो साताबाट यहाँ हिमपात हुने समय हो ।

गतवर्ष हिमपात हुने समयमा पनि हिमपात हुन सकेको थिएन ।

यसवर्ष समयमा नै हिमपात हुँदा कृषकमा खुशी छाएको छ ।

चिसोले जनजीवन कष्टकर बने पनि समयमा हिमपात हुँदा खेतीपातीका लागि टेवा पुग्नेछ । हिमपात भएपछि स्थानीयमा खेतीपातीका लागि पानी सिञ्चित हुने भएकाले उनीहरु खुशी भएका हुन् ।

यस समयमा परेको हिउँ फागुन, चैत्रसम्म रहने भएकाले सिंचाईका लागि पानी बोटबिरुवाको जरासम्म पुग्ने हुन्छ ।

हिमपात भएपछि यहाँ आवतजावत र दैनिक कामकाज गर्न सकस भएको छ ।