सुदूरपश्चिममा सत्ता गगठबन्धनलाई सुविधाजनक मतभार,प्रचारमा ब्यस्त उम्मेदवार

कैलाली:  यही माघ ११ गते हुने राष्ट्रियसभा सदस्य निर्वाचनमा सुदुरपश्चिम प्रदेशबाट तीन राजनीतिक दलका ६ उम्मेदवार चुनावी प्रतिस्पर्धामा रहेका छन् । सुदुरपश्चिममा अल्पसंख्यक तथा अपाङ्गता, अन्य र महिला कलस्टरका तीन पदका लागि निर्वाचन हुदैछ ।

सत्ता गठबन्धनका तर्फबाट अल्पसंख्यक तथा अपाङ्गता कलस्टरमा नेपाली काग्रेंसको तर्फबाट कैलालीका नारायणदत्त भट्ट, अन्य कलस्टरमा नेपाली काग्रेंसको तर्फबाट कञ्चनपुरबाट बलदेव बोहोरा र महिला कलस्टरमा माओवादी केन्द्रबाट बैतडीकी रेणु चन्दलाई उम्मेदवार बनाईएको छ ।

यस्तै नेकपा (एमाले) ले अन्य कलस्टर तर्फ कञ्चनपुरका ईश्वरीप्रसाद खरेल, महिला कलस्टरमा कैलालीकी सावित्री घिमिरे र अल्पसंख्यक तथा अपाङ्गता कलस्टरमा कैलालीका रामचन्द्र जोशीलाई उम्मेदवार बनाएको छ ।

भट्ट नेपाली कांग्रेस कैलाली जिल्ला सभापति हुनुहुन्छ । उहाँ २०६२÷६३ सालको जनआन्दोलनमा घाइते हुनु भएको थियो । बोहरा कञ्चनपुर जिल्ला विकास समितिका सभापति, २०६४ सालमा संविधानसभा सदस्य हुनुभएको थियो । चन्द माओवादी केन्द्रीय सदस्य तथा पहिलो संविधानसभा सदस्य हुनुहुन्छ । गठबन्धनले सुदूरपश्चिममा कांग्रेसलाई अपाङ्ग र अन्यमा गरी २ र माओवादी केन्द्रलाई महिला कोटाको १ सीट दिने सहमति गरेको थियो ।

राष्ट्रियसभा सदस्य निर्वाचनका लागि सुदुरपश्चिम प्रदेशमा प्रदेशसभाका ५३ र स्थानीय तहका एक ७६ मतदाता रहेका छन् । प्रदेश सभा र स्थानीय तहको गरी कुल ६१०० मतभार रहेको छ ।

कुन दलको मतभार कति ?

सुदूरपश्चिम प्रदेशमामा कांग्रेसले ८८ वटा स्थानीय तह मध्ये ४० ठाउँमा प्रमुख तथा अध्यक्ष र ४६ ठाउँमा उपप्रमुख तथा उपाध्यक्ष जितेको छ । ५३ सदस्यीय प्रदेश सभामा कांग्रेसको १९ सिट रहेको छ । आन्तरिक मामिला मन्त्री पृथ्वीबहादुर सिंहको सवारी दुर्घटनामा मृत्यु भएपछि उनको सिट रिक्त छ । अहिले प्रदेश सभामा कांग्रेसका १८ सदस्य छन् । कांग्रेससँग स्थानीय तहतर्फ १६३४ र प्रदेश सभातर्फ ९५४ गरेर कुल २५८८ मतभार रहेको छ ।

दोस्रो ठूलो दल नेकपा एमालेले स्थानीय तह तर्फ २६ प्रमुख तथा अध्यक्ष र २४ उपप्रमुख र उपाध्यक्ष रहेको छ ।   प्रदेश सभामा १० जना सांसद छन् । यो हिसाबले उसको मतभार स्थानीय तहमा ९५० र प्रदेश सभामा ५३० गरेर १४८० रहेको छ ।

यस्तै तेस्रो दल नेकपा माओवादी केन्द्रका १४ स्थानीय तहमा प्रमुख तथा अध्यक्ष र ११ मा उपप्रमुख तथा रहेका छन् । प्रदेशसभामा ११ सांसद रहेका छन् । माओवादीको स्थानीय तहतर्फ ४७५ र प्रदेशसभातर्फ ५८३ गरेर कुल मतभार १०५८ छ ।

४ स्थानीय तहमा प्रमुख तथा अध्यक्ष, ३ स्थानीय तहमा उपप्रमुख तथा उपाध्यक्ष र ७ जना प्रदेश सभा सदस्य जितेको नागरिक उन्मुक्ती पार्टीको मतभार ५०४ रहेको छ ।

२ स्थानीय तहमा प्रमुख तथा अध्यक्ष र ३ स्थानीय तहमा उपप्रमुख तथा उपाध्यक्ष जितेको नेकपा एकीकृत समाजवादीको मतभार ३०७ रहेको छ । स्थानीय तहमा दुई प्रमुख र अध्यक्ष तथा एउटा उपाध्यक्ष स्वतन्त्रले जितेका थिए ।उनीहरुको मतभार ५७ रहेको छ ।

प्रदेशसभामा राप्रपासँग एक जना सांसद रहेकाले उसको मतभार ५३ छ भने एक जना स्वतन्त्र सांसदको मतभार पनि ५३ छ । यो हिसाबले हेर्दा सुदूरपश्चिम प्रदेशमा कुल ६१०० सय मतभार रहेकोमा ७३ प्रतिशत अर्थात ४४५७ अहिले कायम सत्तारुढ गठबन्धनसँग छ ।

सत्तारुढ गठबन्धनसँग ७३ प्रतिशत मतभार हुँदा प्रमुख प्रतिपक्षी दल नेकपा एमालेसँग १४८० र राप्रपाको मतभार ५३ मतभार छ ।  स्थानीय तहको ५७ र प्रदेश सभाको ५३ गरेर ११० मतभार स्वतन्त्रको रहेको छ । निर्वाचनको मिति नजिकिँदै गर्दा उम्मेदवारहरु चुनावी प्रचार प्रसारमा जुटेका छन् .।