रामेछापमा ट्याक्टर दुर्घटना, एकको मृत्यु, दुई घाइते

रामेछाप- मंगलबार दिउँसो रामेछापको रामेछाप नगरपालिका वडा नं ९ ल्याङ्गल्याङ्गको च्युरिवोटमा टयाक्टर दुर्घटना हुँदा एक जनाको मृत्यु भएको छ ।

मृत्यु हुनेमा ट्याक्टरका चालक बर्ष ३७ का गुणराज श्रेष्ठ रहेका छन् । दुर्घटनामा दुई जना घाइते भएका छन् । घाईते हुनेहरुमा रामेछाप नगरपालिका-८ का मनोज मगर र चन्द्र बहादुर शाही रहेको वडा अध्यक्ष चन्द्र बहादुर श्रेष्ठले जानकारी दिनु भयो ।

सुनकोसी नदीको मरिङघाटबाट बालुवा लिएर ल्याङ्गल्याङ्गतर्फ आइरहेको ना ५ त ६५३६ नम्बरको टयाक्टर अप्ठेरो सडकको उकालोमा पुगेर ब्याक गर्दा डिलबाट करिब २ सय मीटर तल खसेको थियो ।

घाईतेहरुमध्ये चन्द्र शाहिको अवस्था चिन्ताजनक छ भने मनोजको अवस्था सामान्य रहेको छ । दुबैको जिल्ला अस्पताल रामेछापमा उपचार भइरहेको जिल्ला प्रहरी कार्यालय रामेछापले जनाएको छ ।

दुर्घटनाको कारण बारे अनुसन्धान भइरहेको जिल्ला प्रहरी कार्यालय रामेछापका प्रहरी निरीक्षक रन्जन गिरीले जानकारी दिनुभयो ।