२ पटक सर्किट लागेर ६० मिनेट कारोवार रोकिएपछि सम्हालिएको बजार

काठमाडौँ- उच्च अंकले बढेर सर्किट लगाउदै अघि बढेको नेप्से २ पटक सर्किट लागेर ६० मिनेट कारोवार रोकिएपछि अहिले सम्हालिएको छ । २ पटक कारोवारमा अवरोध सिर्जना गरेपछि बजार सम्हालिएको हो । मौद्रिक नीतिपछि पहिलो पटक खुलेको बजार २ मिनेट पनि हुन नपाउदै नेप्से ४ प्रतिशतले बढेपछि पहिलो सर्किट व्रेक लगाएर २० मिनेट कारोवार बन्द गरिएको थियो । त्यसपछि बजार खुल्दा पनि नेप्से बढ्ने क्रम रोकिएन र ५ प्रतिशतले बढेपछि बजारमा दोश्रो सर्किट ब्रेक लाग्यो र बजार ४० मिनेटका लागि बन्द गरिएको थियो ।

प्रि ओपनमा नै ३८ अंकले बढेको बजार दोश्रो सर्किट ब्रेक लाग्दा नेप्से १ सय २९ अंकले बढेर नेप्से परिसुचक २ हजार ६ सय ९७ नाघेको थियो । त्यती बेलासम्म कारोवार रकम भने ५२ करोड ५० लाख रुपैयाँको हाराहारीमा मात्र थियो । राष्ट्र बैंकले चालु आर्थिक वर्षको लागि ल्याएको मौद्रिक नीतिले संस्थागत लगानीकर्ताका लागि यस अघि लगाएको लगानीको सीमा हटाएको छ । त्यसको असर बजारमा देखिएको हो ।

सोही कारण लगानीकर्ताहरु धेरै पूजी भएका तर सस्तो मुल्य रहेका बैक तथा वित्तिय संस्थाका शेयर किन्न झुम्मिदा बजारमा असर देखिएको हो । नेप्सेले बजारमा एक घण्टा नबित्दै ४ प्रतिशतले मूल्य बढे वा घटे २० मिनेट, दुई घण्टा नबित्दै ५ प्रतिशतले बढे वा घटे ४० मिनेटको लागि कारोवार रोक्ने नियम बनाएको छ । नेप्सेको नियमान अनुसार जुनसुकै समयमा ६ प्रतिशतले बढेमा वा घटेमा सो दिनकै लागि कारोबार बन्द हुन्छ ।।