दैनिक उपभोग्य वस्तुको अभाव हुँदैनः मन्त्री भण्डारी

काठमाडौँ-  उद्योग वाणिज्य तथा आपूर्तिमन्त्री दामोदर भण्डारीले चाडपर्वका समयमा दैनिक उपभोग्य वस्तुको कुनै अभाव नहुने स्पष्ट पार्नुभएको छ ।

प्रतिनिधिसभा, उद्योग तथा वाणिज्य र श्रम तथा उपभोक्ता हित समितिको आजको बैठकमा उहाँले उपभोग्य वस्तुको कृत्रिम अभाव र कालोबजारी हुन नदिइने प्रतिबद्धता व्यक्त गर्नुभयो ।

मन्त्री भण्डारीले चाडबाडका समयमा चिनी, चामललगायत दैनिक अत्यावश्यक वस्तुको अभाव नहुने गरी सहज आपूर्ति र सुपथ मूल्यमा बिक्री गर्न सरकारले कुनै कसर नराख्ने स्पष्ट पार्नुभयो । कालोबजारी र कृत्रिम अभाव हुन नदिन बजार अनुगमनलाई प्रभावकारी बनाइने उल्लेख गर्दै उहाँले बजारलाई व्यवस्थित बनाउन समितिले दिने निर्देशन सरकारले पूर्ण पालना गर्ने बताउनुभयो ।

“चिनीमा कालोबजारी र कृत्रिम अभाव तथा मूल्यमा तलमाथि नहोस् भनेर उत्पादन र आयातको परिणाम विश्लेषण गरेर एकीन गर्छौं”, मन्त्री भण्डारीले भन्नुभयो, “आगामी दिनमा चिनीको अभाव हुने अवस्थाका बारेमा समितिमा छलफलको विषय नै नबन्ने गरी मन्त्रालयले तयारी गर्नेछ ।” उहाँले अन्तरमन्त्रालय समन्वय गरेर आवश्यक प्रबन्ध मिलाइने विश्वास दिलाउनुभयो ।

सहज आपूर्ति र सुपथ मूल्य पसल सञ्चालन गर्न निर्देशन

समितिले दैनिक उपभोग्य वस्तुको सहज आपूर्ति र सुपथ मूल्य पसल सञ्चालन गर्न सरकारलाई निर्देशन दिएको छ । समितिले चाडपर्वका समयमा उपभोग्य वस्तुको कालोबजारी र कृत्रिम अभाव हुन नदिन सरकारलाई निर्देशन दिएको समिति सचिव रामकुमार पौडेलले जानकारी दिनुभयो ।