रामेछाप पहिरो अपडेटः दुई जनाको मृत्यु, आठ जना बेपत्ता, उद्धार कार्य जारी

रामेछाप- रामेछाप जिल्लाको दोरम्बा शैलुङ्ग गाउँपालिका- ३ लेखर्कमा गएराति भीषण वर्षापछि आएको पहिरोमा परी दुई जनाको मृत्यु भएको छ । पहिरोमा परी ८ जना बेपत्ता भएका छन् ।

पहिरोले घर पुरिंदा स्थानीय चण्डिका थापा र उनका एक वर्षका छोराको मृत्यु भएको गाउँपालिकाका उपाध्यक्ष खमला थापा मगरले बताउनुभयो । मृतक दुवै जनाको शव पहिरोबाट निकालिएको उपाध्यक्ष थापामगरले जानकारी दिनुभयो ।

लेखर्क गाउँमाथिबाट आएको पहिरोले चारवटा घर बगाउँदा घरमा रहेका आठ जना बेपत्ता रहेको गाउँपालिकाका अध्यक्ष मैनकुमार मोक्तानले बताउनुभयो ।

घटना भएको थाहा पाए लगत्तै उद्धार टोलीसहित बिहानै गाउँपालिकाका अध्यक्ष मैनकुमार मोक्तान घटनास्थल पुगिसक्नु भएको छ । अहिले नेपाली सेना नेपाल प्रहरी र स्थानीयले खोजी कार्यलाई तिव्रता दिएको रामेछापका प्रमुख जिल्ला अधिकारी अनिता निरौलाले बताउनुभयो ।

भीषण वर्षाका कारण अँधेरी खोलामा आएको बाढीले त्यहाँको पक्की पुल समेत बगाएको छ । पहिरोले बगाएका घरहरु गाउँबाट करिव ७ सय मिटर तल अंधेरी खोलामा पुर्याएको छ ।

खोलामा आएको भिषण बाढीले घरहरु र घरभित्र रहेका मानिस बगाएको हुनसक्ने अनुमानका आधारमा खोजिकार्य गरिएको स्थानीयले बताएका छन् । घट्नाको थप विवरण आउन बाँकी छ ।