भारतीय गोर्खा राई फल्सका ‘कर्णेल अफ दी रेजिमेन्टको नेपाल भ्रमण

काठमाडौँ – भारतीय सेनाका मेजर जनरल तथा ३ गोर्खा राई फल्सका ‘कर्णेल अफ दी रेजिमेन्ट’ चरण जीत सिंह देवगन नेपाल भ्रमण सकेर स्वदेश फर्किनुभएको छ । ६ दिने नेपाल भ्रमणका लागि मेजर जनरल देव गन गत १४ असोजमा काठमाडौ आउनुभएको थियो।

भ्रमणका क्रममा जनरलले नेपाली सेनाका प्रधानसेनापति अशोक राज सिग्देलसँग नेपाली सेनाको मुख्यालयमा शिष्टाचार भेटवार्ता गर्नुभयो । नेपालसँग भारतको द्विपक्षीय सैन्य सम्बन्धलाई अझ अघि बढाउने र दुई देशका सेनाबिचको सम्बन्धलाई सुदृढ पार्ने विषयमा प्रधानसेनापतिसँग संवाद भएको काठमाडौँ स्थित भारतीय दूतावासव्दारा जारी विज्ञप्तिमा जनाएको छ ।

मेजर जनरल देवगनको भ्रमण सफल र फलदायी रहेको भारतीय दूतावासले जनाएको छ । उहाँले दुवै देशको द्विपक्षीय सम्बन्धलाई अघि बढाउन खेलेको कुशल व्यावसायिक भूमिका र नेपालमा भूतपूर्व सैनिकहरूको कल्याणका लागि लिइएका प्रयासका लागि भारतीय राजदूतावास स्थित रक्षा प्रभागका कर्मचारीहरूको प्रशंसा गरेको दूतावासव्दारा जारी विज्ञप्तिमा उल्लेख छ ।

उहाँले नेपाल भ्रमणको क्रममा विभिन्न उच्चस्तरीय भेट तथा पोखरा भ्रमण गर्नुभएको थियो।

उहाँले पोखरामा वीरता पुरस्कार विजेता र वीर नारीलाई सम्मान गर्नुभयो । नेपाल भ्रमणका क्रममा उहाँले रक्षा प्रभागका विभिन्न शाखा र भूतपूर्व सैनिक अंशदायी स्वास्थ्य योजना (ईसीएचएस) पोलिक्लिनिकको भ्रमण समेत भ्रमण गर्नुभएको थियो । उहाँले भूतपूर्व सैनिकको सेवामा ईसीएचएस नेपालको पहुँचलाई अझ अगाडी बढाउने कुरामा जोड दिनुभएको दूतावासव्दारा जारी विज्ञप्तिमा उल्लेख छ ।

मेजर जनरल देवगनलाई नेपालका लागि भारतीय रक्षा सहचरी कर्णेल बि सुब्रमण्यमले त्रिभुवन अन्तर्राष्ट्रिय विमानस्थलमा स्वागत गर्नु भएको थियो।