खाद्यले सुरु गर्यो दशैं लक्षित खसी, बोका तथा च्यांग्रा किनबेच
जिउदो खसी र बोकाको मुल्य प्रतिकिलो ६ सय ७० रुपैया निर्धारण
काठमाडौँ- काठमाडौ उपत्यकामा दशै लक्षित खसी, बोका तथा च्यांग्रा किनबेच सुरु भएको छ । खाद्य व्यवस्था कम्पनीले दशैं लक्षित खसी र च्याङग्रा बेच्न सुरु गरेको हो । काठमाडौं उपत्यकालाई लक्षित गरी कम्पनीले मुस्ताङबाट च्याङग्रा एवम् मकवानपुर, दाङ लगायत स्थानबाट खसी ल्याएको छ ।
बजारको मुल्य समायोजन गर्न खाद्यले बर्षेनी खशी, बोका तथा च्यांग्रा गरी एक हजार देखि एक हजार ५ सयको संख्यामा बेच्ने गरेको छ । यो बर्ष खाद्यले करीव ४ करोड रुपैया वारवरको एक हजार ५ सय खशी, बोका र ३ सय च्यांग्रा बिक्री गर्ने लक्ष्य राखेको छ । तर आइतबारसम्म ३ सय च्यांग्रा र २ सय ८ खशी बोकामात्र काठमाडौ भित्रिएका छन । बाकी केही दिनभित्रमा आइइपुग्ने र नवमीसम्म बिक्री खुला राख्ने खाद्यको तयारी छ ।
खाद्यले यो बर्ष जिउदो खशी र बोकाको मुल्य प्रतिकिलो ६ सय ७० रुपैया निर्धारण गदै त्यसमा प्रतिकिलोमा १० रुपैया पनि छुटको व्यवस्था गरेको छ । यस्तै च्यांग्राको मुल्य प्रतिकिलोमा १० रुपैया छुटगरी एक हजार २ सय ५० निर्धारण गरेको छ । खशी, बोका तथा च्यांग्रालाई खरिद गर्दा नै स्वास्थ्य परिक्षण गरेर मात्र ल्याउने गरेको खाद्य व्यवस्था तथा व्यापार कम्पनी लिमिटेडको भनाई छ ।
स्वास्थ्य जाच गरेर स्वस्थलाई हरियो र अस्वस्थलाई रातो स्टीकर लगाउने गरिन्छ । यस्तै सरकारले ल्याएको खशी बोकाले बजारको माग धान्न नसक्ने भएकाले निजीक्षेत्रले पनि बर्षेनी दशैको लागि खशी बोका तथा च्यांग्रा गरी २५ हजार बढी ल्याउने गरेका छन् ।
काठमाडौ जोड्ने राजमार्गहरु अवरुद्ध हुदा यो बर्ष माग बमोजिम ल्याउन कठिन भएको व्यापारीले वताएका छन् । निजी क्षेत्रले भने खाद्य संस्थानभन्दा ५० रुपैया बढी मुल्य कायम गरेको छ । ढुवानीको खर्च बढी आउने भएका कारण सरकारी मुल्यभन्दा बढी तय गरेको व्यापारीको भनाई छ ।
काठमाडौ उपत्यकामा दशै अवधिमा खशी, बोका तथा च्यांग्रा गरी करीव ४२ देखि ४५ हजारको माग छ । राजमार्ग अवरुद्ध भएका कारण यो बर्ष माग अनुरुपको खशी बोका पुरयाउन सकिने अवस्था नरहेको व्यापारीहरु वताउन्छन् ।
उपत्यकामा खाद्यले दाङ, नवलपरासी, तथा मकवानपुरबाट र निजी क्षेत्रले पनि दाङ, सुर्खेत, दैलेख, सिन्धुली, चितवन, तथा मकवानपुरबाट खशी बोका तथा मुस्ताङ बाट ल्याउने गरेका छन् ।।
प्रतिक्रिया राख्नुहोस्