बाढीपछि खण्डहर बनेको छ बेथानचोक (फोटो फिचर)

काभ्रे- असोजको दोस्रो सातामा पानी सहित आएको बाढी र पहिरोले काभ्रेको विभिन्न स्थानमा क्षति पुर्‍याएको छ ।

काभ्रेको १३ वटा स्थानीय तहमध्ये बेथानचोक गाउँपालिकामा पनि धेरै जनधनको क्षति भएको छ । जहाँ १२ जनाको मृत्यु भएको र १ जना बेपत्ता भएको छ । बाढी र पहिरोबाट पालिका भर करिब ६ सय घर परिवार विस्थापित भएका छन् ।

बाढी पहिरोबाट प्रभावितहरू भने सुरक्षित बासस्थानको पर्खाइमा रहेका छन् । बाढी र पहिरोले घरबार विहीन भएपछि बासस्थान निर्माणका लागि सुरक्षित स्थान नभएपछि स्थानीय अहिले अन्यौलमा छन् ।

त्यस्तै, कृषि उपज नै आम्दानीको प्रमुख श्रोत भएको सो स्थानका स्थानीयको अहिले आम्दानीको श्रोत बाढी र पहिरोका कारण गुमेको स्थानीय बताउँछन् ।

गाउँपालिकामा बाढी र पहिरोले अर्बौंको क्षति भएको बेथानचोक गाउँपालिकाका प्रवक्ता मधुसुदन तिमल्सिनाले बताउनुभयो ।

उहाँका अनुसार, यहाँ अहिले बाटो, बिजुली, सञ्चार लगायतका पूर्वाधारका सेवामा अवरुद्ध भएको छ । उहाँका अनुसार, बेथानचोक गाउँ पालिकाभित्र विभिन्न स्थानमा रहेका भौतिक संरचना पनि ठूलो क्षति भएको छ ।

पालिकाको आफ्नो भवनमा बाढीका कारण ठूलो नोक्सानी भएको प्रवक्ता तिमल्सिनाले जानकारी दिनुभयो ।

पालिकाको प्रशासनिक भवनको कार्यालयमा बाढी पसेकाले कार्यालयमा भएका महत्वपूर्ण कागजातहरू बिग्रिएकाले यसबाट पनि धेरै क्षति भएको उहाँले बताउनुभयो ।

बेथानचोक गाउँपालिकाको वडा नं ४, वडा नं २, वडा नं ३ र वडा नं ५ मा धेरै क्षति भएको छ ।

बाढी र पहिरोका कारण पालिकामा एक साता बिजुली, सडकबाटो, सञ्चार, खानेपानी लगायतका अत्यावश्यक सेवाहरू अवरुद्ध भएको थियो ।

अहिले पालिकाको सबै वडाहरूमा सडक सञ्जाल जोडिसकेको, सञ्चार सेवा प्रवाह गरिएको, र नेपाल विद्युत प्राधिकरण, पालिकाको सहकार्यमा पालिकाको सबै वडामा विद्युत जडानको कार्य भइरहेको उहाँले जानकारी दिनुभयो ।।