उपभोक्ताले छोइ नसक्नु भो तरकारीको मूल्य

काठमाडौँ- कालिमाटी फलफुल तथा तरकारी बजार विकास समितिको मूल्यसूची हेर्ने हो भने अधिकांश तरकारीको मूल्य घटेको छ । तर कालिमाटी होलसेल बजारमै हरियो तरकारीको मूल्य उच्च छ । जुन खुद्रा बजारमा आइपुग्दा उपभोक्ताले किनिनसक्नु महँगो छ ।

कालिमाटी बजारको तथ्यांकले तरकारीको मूल्य घटेको देखाए पनि कालीमाटी होलसेल बजारमै चर्का मूल्यमा तरकारी विक्री भइरहेको छ । फरक फरक पसलमा तरकारीको मूल्य पनि फरक फरक छ । होलसेलमै मूल्य चर्का भएपछि खुद्रा बजारमा उपभोक्ताले छोइ नसक्नु मूल्यमा तरकारी किन्नु परेको छ ।

कालिमाटी तरकारी बजार विकास समितिका अनुसार असोज २३ गते देखी आसोज २९ गते मंगलबारसम्म एक साताको अवधिमा चिचिन्डोको मूल्य सबैभन्दा बढी ४५ प्रतिशतले घटेको तर बजारम भने तरकारीको मुल्य उच्च छ।

त्यस्तै,घिउ सीमीको ३४ प्रतिशत,तने बोडीको ३४ प्रतिशत,मकै बोडीको ३१ प्रतिशत घिरौलाको मूल्य २३ प्रतिशतले घटेको देखाइएपनि बजारमा भने त्यस्तो पाइदैन ।  बजार अनुगमनको जिम्मा पाएको वाणिज्य आपूर्ति तथा उपभोक्ता संरक्षण विभागले भने कहि कतै बढी मूल्य लिएको फेला पारे कडा कारवाही गर्ने जनाएको छ ।

चाडवाड वा अन्य कुनै पनि समय बजारमा कृत्रिम अभाव गर्ने,बढी मूल्य लिने तथा कालो बजारी गर्ने कुनै पनि व्यापारी वा फर्मलाई कारवाही गर्ने विभागले जनाएको छ । तर विभागको अनुगमन प्रभावकारी नहुदा उपभोक्ताले राहत पाउन सकेका छैनन

चाडवाडमा बढी मात्रामा प्रयोग हुने तरकारीहरुको मूल्य भने बढेको कालीमाटी तरकारी बजार विकास समितिले जनाएको छ ।