गोरखामा सामुहिक रुपमा मनाइयो ‘मकै सुकाउने पर्व’

गोरखा- नेवारी समुदायको साँस्कृतिक पर्व ‘मकै सुकाउने पर्व'(सकिमना) गोरखामा मनाइएको छ।

गोरखा नगरपालिका-६ ठुलोआँगनमा सामुहिक रुपमा यो पर्व मनाइएको हो। लोप भइसकेको पर्व ऐतिहासिक क्षेत्र संरक्षण तथा विकास समितिको अगुवाइमा २०७६ सालबाट सामुहिक रुपमा मनाउन थालिएको हो ।

कार्त्तिक शुल्क पूर्णिमाको रात अमृत बर्षा हुने र भुटेको मकै, भटमास, बदाम, उसिनेको पिँडालु, सखरखण्ड लगायतका खाद्य पदार्थ चन्द्रमामा सुकाएर खाएमा अमृत समान हुने विश्वासका साथ सकिमना पुन्हिः पर्व मनाउने प्रचलन रहेको छ ।

करिव करिव लोप भइसकेको यो पर्व २०७६ सालबाट सामुहिक रुपमा मनाउन थालिएको ऐतिहासिक क्षेत्र संरक्षण तथा विकास समितिका अध्यक्ष शुरेसमान श्रेष्ठले बताउनुभयो ।

देवताको आकृति बनाएर अन्न सुकाउने र प्रसादको रुपमा ग्रहण गर्ने प्रचलन रहेको उनले बताए ।

भुटेको मकैसँगै भटमास, केराउ, चना, लगायतका गेडागुडी, जुनेलो, बदाम, सखरखण्डलगायत बिभिन्न फलफुल पनि सँगै राख्ने प्रचलन छ ।

सदरमुकामका नेवार समुदायले यस पर्वलाई महत्वका साथ सामुहिक रुपमा ठुलोआगनमा मनाएका हुन् ।

समितिको अगुवाइमा बाजागाजासहित बिभिन्न धार्मिक परम्परा झल्कने गरी यस पटक मकै सुकाइएको थियो ।।