राज्यका सबै संयन्त्र लागे मात्रै भैरहवा विमानस्थल दीर्घकालीन रूपमा सञ्चालनमा आउँछ: महानिर्देशक अधिकारी

भैरहवा – नेपाल नागरिक उड्डयन प्राधिकरणका महानिर्देशक इन्जिनियर प्रदीप अधिकारीले गौतम बुद्ध अन्तर्राष्ट्रिय विमानस्थल दीर्घकालीन रूपमा सञ्चालन गर्न राज्यका सबै संयन्त्र लाग्नुपर्ने बताउनुभएको छ ।

बिहीबार लुम्बिनीमा भएको लुम्बिनीमा ‘लगानी: अवसर र चुनौती’ विषयक कार्यशाला गोष्ठीमा बोल्दै महानिर्देशक अधिकारीले यस्तो बताउनुभएको हो । उहाँले गौतम बुद्ध र पोखरा अन्तर्राष्ट्रिय विमानस्थल दीर्घकालीन रूपमा सञ्चालन गर्न नागरिक उड्डयन प्राधिकरण मात्रैको पहलले सम्भव नभएको बताउनु भयो । उहाँले त्यसको लागि राज्यका सम्पूर्ण संयन्त्रहरूको पनि साथ र सहयोग आवश्यक रहेको बताउनु भयो । महानिर्देशक अधिकारीले सरकारले सबैभन्दा पहिला हवाई ट्राफिक व्यवस्थापनको लागि भैरहवा,पोखरामा उडान गर्नुपर्ने नीति बनाउन आवश्यक रहेको बताउनु भयो । उहाँले सरकारले श्रमिक उडान भैरहवाबाट गर्ने भनेपछि सबै म्यानपावरहरू भैरहवा जाने वातावरण बन्ने बताउनु भयो । उहाँले हवाई ट्राफिकलाई भैरहवा उडान अनिवार्य नगरेसम्म भैरहवा विमानस्थलको दीर्घकालीन उडानको कल्पना गर्न नसकिने बताउनु भयो । उहाँले हवाई उडान व्यवस्थापनमा सबै मिलेर नियमन गर्न आवश्यक रहेको भन्दै यो विषयमा सरकारले ध्यान दिनुपर्नेमा जोड दिनुभयो । उहाँले पोखरा अन्तर्राष्ट्रिय विमानस्थल चीन सरकारले बनाएकाले सरकारले विमानस्थल सञ्चालनको लागि चीनले काठमाडौँमा गर्दै आएको उडानको २५ प्रतिशत उडान पोखरा गर्न आग्रह गर्नुपर्ने बताउनु भयो । उहाँले  नेपाल र हिमालय एयरलाइन्सलाई पनि हरेक विमानस्थलमा एक–एक उडान गर्नुपर्ने मापदण्ड सरकारले बनाउनु जरुरी रहेको बताउनु भयो । उहाँले सरकारले हवाई उडानलाई नियमन गर्दा तीन वटै विमानस्थल चल्न सक्ने बताउनु भयो । उहाँले  अहिले डन्डा लगाएर भैरहवा विमानस्थलमा उडान पठाएको दाबी गर्नुभयो ।

उहाँले भन्नुभयो,‘सरकारले श्रमिक उडान भैरहवाबाट गर्ने भनेपछि सबै म्यानपावरहरू भैरहवा आउँछन् । हवाई ट्राफिकलाई सेक्रिग्रेट नगरेसम्म आजको दिनसम्म भैरहवा विमानस्थलको दीर्घकालीन उडानको कल्पना गर्न पनि सकिँदैन । ५० लाख पर्यटक ल्याउने प्रतिबद्धता हुनुपर्छ । सबै मिलेर रेगुलेट गरौँ । यो कुरामा सरकारले पनि ध्यान दिनुपर्छ । हामीले पनि यो कुरामा पहल गर्नुपर्छ । क्यान अन्तर्गत रहेको हुनाले भैरहवा र काठमाडौँ विमानस्थलले कमाएको रकम पनि केन्द्रीय ट्रेजरीमा जान्छ । क्यानलाई पनि केही फरक पर्दैन । पोखरा चीनले बनाएको हो । सञ्चालनको लागि चीनले काठमाडौँमा गर्दै आएको उडानको २५ प्रतिशत उडान पोखरा गर्न आग्रह गरौँ । नेपाल र हिमालयलाई पनि हरेक विमानस्थलमा एक–एक उडान गर्नुपर्छ भन्यौँ । यसरी रेगुलेट गर्दा तीन वटै विमानस्थल चल्छन् । मार्केटको आधारमा हो भने काठमाडौँ बाहेक अन्य विमानस्थल चल्न सक्दैनन् । अहिले डन्डा लगाएर भैरहवा विमानस्थलमा उडान पठाएको हो । कति दबाब छ मलाई मात्रै थाहा छ । कम्तीमा अहिले ६ वटा एयरलाइन्सहरू आए । राज्यले आफ्नो शक्ति देखाउन सक्दा सबै कुराहरू सम्भव छन् । विमानस्थल सञ्चालनमा सरकारले रेगुलेट गर्नुपर्छ । नत्र आन्तरिक मात्रै चलाएर चित्त बुझाउनुपर्छ । हवाई भाडामा मनोमानी नहोस् भन्नाले नेपाल वायुसेवा निगम राखिएको हो । तर नेपालमा विमानस्थल बढ्दो क्रममा छन् भने जहाजको सख्या घट्दो अवस्थामा छन् । नेपाल एयरलाइन्स र हिमालय एयरलाइन्ससँग १० देखि १२ वटा जहाज भएको भए सहुलियत समेत दिनुपर्ने अवस्था थिएन । भैरहवा लगायत अन्य विमानस्थल सञ्चालनको लागि सम्पूर्ण राज्य संयन्त्र लाग्नुपर्छ । हवाई उडान नागरिक उड्डयन प्राधिकरणले मात्रै गर्न सक्ने विषय होइन । सबै मिल्नुपर्छ ।’

उहाँले राज्यले शक्ति देखाउँदा कम्तीमा अहिले ६ वटा एयरलाइन्सहरू भैरहवा विमानस्थलबाट उडान गरेको बताउनु भयो । उहाँले  नेपालमा विमानस्थल बढ्दो क्रममा रहे पनि विमानको सङ्ख्या घट्दो अवस्थामा रहेकाले पनि समस्या देखिएको बताउनु भयो । उहाँले नेपाल एयरलाइन्स र हिमालय एयरलाइन्ससँग १० देखि १२ वटा जहाज भएको भए सहुलियत समेत दिनुपर्ने अवस्था नभएको बताउनु भयो ।