पत्रैपत्रको जिन्दगी ( कविता )

जिन्दगी पत्रैपत्र भएकोछ

उक्कायो छोडायो

कोट्यायो नङ्ग्यायो

उधिन्यो र खोतलो

खुर्कियो तास्यो !!

जे जे गरे पनि

जतिसुकै गरे पनि

पत्रहरू आइरहेछन्

एक एक गर्दै खुलिरहेछन् !!

खै !

आफैंलाई चिन्न गाह्रोभएकोछ

आज चिन्यो भोलिपल्टै फेरिन्छ

पुरानो हुँदैन , स्मरणले पनि छुँदैन

आज जे छ भोलि हुँदैन !!

सायद !

गति भिन्न भएर होला

हेर्दाहेर्दै फेरिन्छ विचारको चोला

बगिरहन्छन् विचारका खोला

कहिले सुक्छन् कहिले फैलन्छन्

कहिले गड्गडाउँछन् कहिले हड्बडाउँछन् !!

खै कस्तो !

केस्रा परेको हो

के के खेस्रा कोरिएको हो

गन्न नसकेर दिमाख मोरिएको छ

सोच्दासोच्दै एकोहोरिएको छ !!