पोखरामा मङ्गलवारबाट अन्तर्राष्ट्रिय बेलुन महोत्सव

कास्की –  पर्यटनको राजधानी पोखरामा मङ्गलवारबाट पृथक् महोत्सव सुरु हुँदै छ । फेवातालको सिरान पामेमा पुस ९ देखि १७ गतेसम्म अन्तर्राष्ट्रिय हट एयर बेलुन फेस्टिभल हुन लागेको हो ।

अङ्ग्रेजी नयाँ वर्षको संघारमा हुन लागेको यो महोत्सव नेपालमै पहिलो पटक पोखरामा हुन लागेको हो । महोत्सवमा १५ देशका १७ हट एयर बलुन पोखराको आकाशमा उड्ने छन् । बेलुन नेपाल प्रालिले पोखरा पर्यटन परिषद्सँग सहकार्य गरी महोत्सव आयोजना गरेको हो ।

बलुन नेपाल प्रालिका अध्यक्ष विक्रम बाडे पोखरा महानगरपालिका वडा नम्बर २४ को लौरुकदेखि चङ्खपुरसम्मको तीन किलोमिटरमा महोत्सव हुने बताउनुहुन्छ । नियमित उडानका बेला नौ हजार फिटसम्म पुग्ने बेलुन महोत्सव अवधिमा भने पाँच हजार फिटसम्ममात्र उडाइनेछन् ।

माछापुच्छ्रे, अन्नपूर्ण, धौलागिरि हिमालसहित पोखरा उपत्यका अवलोकन गर्दै बेलुनका यात्रीहरूले सूर्योदय र सूर्यास्तका सुन्दर दृश्यसमेत हेर्न पाउने छन् । “पोखराको मनोरम दृश्य, यातायातको पहुँच, पर्यटकीय पूर्वाधार र मौसम अनुकूल भएकाले यहाँ महोत्सव गर्न लागेका हौँ,” वाडेले भन्नुभयो ।

महोत्सवका संयोजकसमेत रहनुभएका पोखरा पर्यटन परिषद्का अध्यक्ष तारानाथ पहरीले साहसिक खेलकुदका माध्यमबाट पर्यटन प्रवर्धन यसले सघाउने अपेक्षा गर्नुहुन्छ । महोत्सवमा नेपालसहित थाइल्यान्ड, भियतनाम, अमेरिका, बेलायत, स्पेन, लिथुआनिया, फ्रान्स, नेदरल्यान्ड्स, कोरिया, जापान, मलेसिया, इटली, अस्ट्रेलियाका र ब्राजिलका पाइलट सहभागी हुने तय छ ।

महोत्सवमा आयोजक बेलुन नेपालका दुई र विदेशी १५ गरी १७ बेलुन उडाइनेछ । महोत्सवमा अवधिमा हरेक दिन साङ्गीतिक कार्यक्रमका साथमा फुड स्टल र विभिन्न खेल हुँदैछ । राजु लामा, एलिना चौहान, दीपक बज्राचार्य, कुमा सागर, कविता नेपाली लगायतले महोत्सवका सहभागीलाई साङ्गीतिक मनोरञ्जन दिनेछ ।

अङ्ग्रेजी नयाँ वर्षका दिन पुस १७ गते आतसबाजीसहित बेलुनमै डिजे सङ्गीत प्रस्तुत गर्ने आयोजकले जनाएको छ । राजधानीमा प्रचलित कुमारी नृत्य र बज्रयोगिनी नृत्यसमेत यो अवसरमा देखाइने भएको छ ।

बलुन नेपाल प्रालिले पोखरामा २०७५ देखि व्यावसायिक रूपमा हट एयर बलुन उडाउँदै आएको छ । महोत्सवलाई पोखरा महानगरपालिका, नेपाल पर्यटन बोर्ड गण्डकी र उद्योग तथा पर्यटन मन्त्रालय गण्डकी प्रदेशले पनि सघाएका छन् । एक सातासम्म चल्ने महोत्सवमा पाँच सय व्यावसायिक उडान हुने आयोजकको अपेक्षा छ । बेलुनमा उड्ने नेपालीले प्रतिव्यक्ति ११ हजार, सार्क र चीनका नागरिकले एक सय २० डलर तिर्नुपर्छ । अरू मुलुकका बासिन्दाले भने एक सय ५० डलर तिर्नुपर्छ ।