ड्रिलिङको काम सकिएसँगै चिनीयाँ अन्वेषणकर्ताको रिपोर्ट कुर्दै भूगर्भ विभाग

दैलेख- दैलेखको जलजलेमा सुरु गरिएको पेट्रोलियम पदार्थ र प्राकृतिक ग्याँस अन्वेषणको कार्य करिव-करिव सकिएको छ ।

२०८१ वैशाख २८ गतेदेखि सुरु गरिएको ड्रिलिङको काम ३ हजार ९ सय ४० मिटर तल पुगेपछि सकिएको अन्वेषणकर्ताहरुले जानकारी दिएका छन । ४ हजार मिटर जमिनमुनि ड्रिलिङ गर्ने अन्तिम लक्ष्य राखिएको थियो । करिब सो गहिराइसम्म पुगेपछि अब अन्वेषणको काम सकिएको हो ।

पेट्रोलियम पदार्थको भण्डारण पत्ता लगाउने अभियान अन्तर्गत यो कार्य सञ्चालनमा छ । अहिलेसम्मको अन्वेषणको कार्यले उत्साहित बनाएको खानी तथा भूगर्भ विभागका पदाधिकारीहरूले जानकारी दिएका छन् ।

अझैँ यकिन भन्न सकिने अवस्था त छैन तर जमिन मुनि लिकेज ग्याँसहरू देखिएका छन्, काम निरन्तर जारी छ । अहिलेसम्म सकारात्मक सङ्केत देखिएका छन् ।

चिनिया टोलीले हरेक मिटरमा सङ्कलन गरेको नमुनाको विशिष्ट अध्ययन गर्न चीनमै लिनुपर्ने भएकोले अन्तिम नतिजा पर्खन भने चिनियाँ टोलीको रिपोर्ट नै कुर्नुपर्ने पदाधिकारीहरूको भनाइ छ ।

भण्डारण पत्ता लागेपछि मात्र आर्थिक विश्लेषण गरेर उत्पादनका लागि थप कामहरू अगाडि बढाइने छ ।

पेट्रोलियम पदार्थ अन्वेषण तथा उत्खनन गर्न चीन सरकारसँग सहमति भएसँगै चीन सरकारको २ अर्ब ४० करोडको आर्थिक तथा प्राविधिक सहयोगमा अन्वेषणको काम सुरु गरिएको थियो ।

यो परीक्षण सफल भए दैलेखको अर्को स्थानमा पनि अन्वेषणको कार्य सुरु हुने खानी तथा भूगर्भ विभागका पदाधिकारीहरूले जानकारी दिएका छन् ।

कहाँ छ पेट्रोलियम अन्वेषण स्थल ?

दैलेख सदरमुकामको नारायण नगरपालिका, दुल्लु नगरपालिका र भैरवी गाउँपालिकाको संगमस्थल शिरस्थान नजिकै जलजले क्षेत्रमा पेट्रोलियम पदार्थको अन्वेषणका लागि ४५ रोपनी जग्गा सरकारले लिएर अन्वेषणको काम सुरु गरिएको छ ।

पेट्रोलियम अन्वेषण स्थल, मध्य पहाडी राजमार्ग सँगै जोडिएको स्थानमा छ । कर्णाली प्रदेशको रारा घुम्ने पर्यटकहरूसमेत अहिले यो स्थानमा हेर्न आउने गरेका छन् ।

दैलेख जिल्लाको मध्य पहाडी सडक खण्डको १ सय २५ किलोमिटर सडक पूर्ण रूपमा कालोपत्रे सम्पन्न भएसँगै जाजरकोट, रुकुम, जुम्ला, हुम्ला, मुगु, सुर्खेत र दैलेख यात्रा गर्ने यात्रुहरू समेत यो स्थान हेर्न दैनिक सयौँको सङ्ख्यामा दैलेख आउने गरेका छन् ।

दिनहुँ २ देखि ३ सय सम्म पर्यटकहरू आएर फोटो खिच्ने गरेको स्थानीयको भनाइ छ । अहिले जलजले क्षेत्रमा होटेल व्यवसाय गर्ने व्यापारीहरू पनि उत्साहित छन ।।