स्वास्थ्य चौकी भवन अलपत्र हुँदा सेवा प्रभावित, ठेकेदार कम्पनी सम्पर्कविहीन

धादिङ- उत्तरी धादिङको नेत्रावती डबजङ्ग गाउँपालिकास्थित वडा नम्बर ५ निर्माणाधीन स्वास्थ्य चौकी भवन निकै लामो समयदेखि अलपत्र अवस्थामा रहेको छ । जसले गर्दा स्थानीयलाई प्रदान गर्ने स्वास्थ्य सेवा समेत प्रभावित भएको छ ।

पुनःनिर्माण प्राधिकरणले गरेको बेवास्ताका कारण भवन निर्माणको काम हुन नसकेको हो । जिल्लामा प्राधिकरणले ठेक्का लगाइ निर्माण गरेको अन्य स्वास्थ्य चौकी भवनको अवस्था पनि अलपत्र छ ।

भवन कटुन्जेमा पुन निर्माण प्राधिकरणले पाँच वर्ष अघि ठेक्का लगाइ निर्माणको काम सुरु गरेको हो । निर्माण कार्य बीचैमा रोकी निर्माणको जिम्मा दिइएको ठेकेदार कम्पनी समेत सम्पर्कविहीन भएपछि निर्माण कार्य अधुरो रहेको हो ।

हरेक वडामा स्वास्थ्य चौकी स्थापना गरी स्थानीयले सुविधा सम्पन्न भवनबाट सेवा पाउने भन्दै निकै खुसी भएकोमा अब भने भवन निर्माणको कामले पूर्ण नपाउने भन्दै निराश बनेका छन् ।

पुरानो भवन भूकम्पका कारण भत्किएपछि उपचारका लागी आएका बिरामीलाई सेवा दिन समेत निकै समस्या भएको गाउँपालिकाका अध्यक्ष मेघनाथ रिजालको भनाइ छ ।

जिल्लामा पुनःनिर्माण प्राधिकरण ठेक्का लगाइ निर्माणाधीन अवस्थामा रहेको आधा दर्जन स्वास्थ्य चौकी भवनको अवस्था अहिले यस्तै अलपत्र रहेको छ । भवन नहुँदा ग्रामीण क्षेत्रमा स्वास्थ्य चौकीबाट बिरामीहरूलाई प्रधान गरिने सेवा सहज तरिकाबाट प्रधान गर्न सकिएको छैन ।

कटुन्जे स्वास्थ्य चौकीको भवन निर्माणका लागी पुनःनिर्माण प्राधिकरणले एम बिल्डर्स नामक निर्माण कम्पनीलाई ६ करोडको लागतमा २०७६ सालमा अठार महिनामा निर्माण सम्पन्न गर्ने गरी निर्माणको जिम्मा दिइएको हो ।

भवन निर्माणको काम बीचैमा छाडेर निर्माण कम्पनी भागेपछि न त सो निर्माण कम्पनीसँग पुनःनिर्माण प्राधिकरणले ठेक्का सम्झौता तोडेको छ न त भवन निर्माणको कामले नै गति लिएको छ ।

भवन निर्माणस्थल वरपर झाडी बनेको छ भने बनेका संरचनाहरू पनि भत्कन सुरु भईसकेको छ । अधुरो भवनको पनि संरक्षण हुन सकेको छैन ।

कटुन्जेमा रहेको स्वास्थ्य चौकीबाट नेत्रावती गाउँपालिकाको पश्चिम क्षेत्रका स्थानी मात्रै नभई उत्तरी धादिङको खनीयावासका स्थानीयले समेत सेवा लिने गरेका छन् ।