चितवन पेट्रोलियम डिलर्स एसोसिएसनमा पहिलो पटक महिला अध्यक्ष

चितवन –  चितवनका महिला उघमी शर्मिला सेढाई पेट्रोलियम डिलर्स एसोसिएसनको अध्यक्ष निर्वाचित हुनुभएको छ ।

एसोसिएसनको इतिहासमा नै शर्मिला पहिलो महिला अध्यक्ष बन्नुभएको छ। चितवनको भरतपुर-१२ निवासी शर्मिला हालै भएको अधिवेशनबाट एसोसिएसनको अध्यक्ष बन्न सफल  हुनुभएको हो ।

शर्मिलाले  वि.सं २०४७ सालमा गोन्द्राङमा स्थापना भएको ॐ गौरीशङ्कर आयल स्टोर्स र वि.सं २०५३ मा स्थापना भएको कुरिन टारको बाबा धाम ट्रेडर्स पेट्रोल पम्पको जिम्मेवारी सम्हाल्दै आउनुभएको छ । वि.सं २०६१ मा उहाँका श्रीमानको देहावसानपछि पनि निरन्तर आफ्नो व्यवसायलाई अगाडि बढाउँदै शर्मिलाले समाजमा आफ्नो प्रतिष्ठा कायम राख्न सफल महिलाको रूपमा आफूलाई स्थापित गर्नुभएको छ।

शर्मिलाले विभिन्न संघ संस्थामा रहेर सामाजिक, शैक्षिक क्षेत्रमा समेत आफूलाई उभ्याउँदै आउनुभएको छ। चितवन पेट्रोलियम डिलर्स एसोसिएसनमा लामो समयदेखि कार्यसमितिमा रही दुई कार्यकाल उपाध्यक्षको जिम्मेवारी पुरा गरिसक्नुभएको शर्मिला हालै भएको जिल्ला अधिवेशनबाट ०८१-०८३ का लागि अध्यक्ष बन्नुभएको हो