भुकम्प प्रभावित म्यानमामा जुन्टा समुहको बम आक्रमण, सात जनाको मृत्यु

काठमाडौं- म्यानमारको सैन्य जुन्टाले युद्धग्रस्त देशको केही भागमा ठूलो बमबारी जारी राखेको छ । संयुक्त राष्ट्रसंघले आक्रमण पूर्ण रूपमा अपमानजनक र अस्वीकार्य भएको उल्लेख गरेको छ ।

म्यान्मामा अस्ति गएको भुकम्पमा परी १६ सय ४४ जनाको मृत्यु भएको छ । भूकम्प पछि सेनाले मानिसहरूलाई उद्धार गर्ने क्रममा जुन्टाले बम खसाल्ने कार्य जारी राखेको समाचारमा उल्लेख छ ।

उत्तरी शान राज्यको नाउङचोमा भएको हवाई आक्रमणमा सात जनाको मृत्यु भएको बीबीसीले उल्लेख गरेको छ । सेनालाई सत्ताबाट हटाउन लडिरहेका लोकतन्त्र समर्थक विद्रोही समूहहरूले भूकम्पको केन्द्रबिन्दु उत्तर-पश्चिमी सागाइङ क्षेत्रको चाङ-यू टाउनशिपमा हवाई बम विस्फोट भएको रिपोर्ट गरेका छन् ।

थाई सीमा नजिकका क्षेत्रहरूमा हवाई आक्रमण गरिएको छ । अपदस्थ नागरिक प्रशासनको प्रतिनिधित्व गर्ने राष्ट्रिय एकता सरकारको सशस्त्र सेनाले पनि आइतबारदेखि भूकम्पबाट प्रभावित क्षेत्रहरूमा रक्षात्मक कार्यहरू बाहेक आक्रामक सैन्य कारबाहीहरू दुई हप्ताको लागि रोक्ने जनाएको छ ।