लोकतन्त्रको संस्थागत विकासका पक्षमा उभिए नागरिक सङ्घ सङ्गठन

काठमाडौँ –  काठमाडौँको माइतीघर मण्डलामा आइतबार बिहान नेपाली नागरिक सङ्घ सङ्गठनहरू सहितको नागरिक समाजले अराजकता र हिंसा रोक्न माग गर्दै धर्ना दिएको छ । लोकतन्त्र, मानव अधिकार र शान्तिको पक्षमा आवाज उठाउँदै उहाँहरूले धर्नामार्फत अराजकता र हिंसा निरुत्साहन गर्न जोड दिनुभएको छ । गणतन्त्रको विकल्प नभएको तर गणतन्त्रलाई संस्थागत गरेर लैजानुपर्नेमा उहाँहरूले जोड दिनुभएको छ  । यसका लागि ‘गणतन्त्रको जग बलियो बनाऔँ’, ‘अराजकता नियन्त्रण गर’, ‘आर्थिक अनियमितता र कालोबजारी रोक’, ‘समानता, न्याय र समावेशिता सुनिश्चित गर’ ‘लोकतन्त्रको रक्षा गर’, ‘नागरिक अधिकारको सुरक्षा गर’, ‘निहित सत्ता स्वार्थको द्वन्द्व अन्त्य गर’, ‘मिडियामाथिको हमला बन्द गर’, ‘प्रेस स्वतन्त्रता कायम गर’, ‘जनताको सुरक्षामा सम्झौता नगर’ जस्ता प्लेकार्ड र नारा सहित ०६२।६३ को नागरिक आन्दोलनको अगुवाइ गरेका नागरिक अगुवाहरू भेला भएका हुन् । उहाँहरूले २०४६ को जनआन्दोलन र २०६२।६३ को नागरिक आन्दोलनको स्मरण गराउँदै लोकतन्त्र र गणतन्त्र बचाउन जस्तोसुकै नागरिक आन्दोलन गर्न पछि नपर्ने उद्घोष गर्नुभएको छ ।

धर्ना कार्यक्रममा बोल्दै गत चैत्र १५ गते काठमाण्डौँको तीनकुनेमा भएको हत्या, हिंसा, लुटपाट, आगजनी जस्ता अमानवीय कार्य अराजक झुन्डबाट भएको र यसको जिम्मेवारी ज्ञानेन्द्र शाहले लिनुपर्ने नागरिक सङ्घ संस्था र नागरिक अधिकारकर्मीले माग गर्नुभएको छ । संविधान सभाबाट निर्माण गरिएको संविधान अनुसार देश सञ्चालन भइरहेको हुँदा देशमा कुनै पूर्व राजा, रजौटा नरहेको कार्यक्रमका वक्ताहरूको भनाई थियो। ।

सञ्चारकर्मीसँग कुरा गर्दै गैरसरकारी संस्था महासङ्घ नेपालका अध्यक्ष तथा वृहत् नागरिक धर्ना अभियानका संयोजक अर्जुन भट्टराईले नेपाली जनतालाई जागृत र सशक्त भएर लोकतन्त्र र गणतन्त्रको पक्षमा उभिन आग्रह गर्नुभयो । समाचार सङ्कलन गर्ने पत्रकारलाई थुन्ने, आगो लगाउने कार्य दण्डहिनाताको पराकाष्ठा हो भन्दै उक्त घटनका दोषीलाई कडा भन्दा कडा सजायको माग पनि अध्यक्ष भट्टराईले गर्नुभयो । मानवअधिकारकर्मी तथा गैसस महासङ्घ नेपालका पूर्व अध्यक्ष गौरी प्रधानले मानव अधिकार हननका गतिविधिको  निन्दा गर्दै लोकतन्त्रको विकल्प अर्को व्यवस्था हुन नसक्ने बताउनु भयो ।

नागरिक समाज र सङ्गठनका प्रतिनिधिहरूले अराजकता, उद्दण्डता र दण्डहिनताको घोर निन्दा गर्नुभएको छ । साथै, उहाँहरूले शान्ति, सामाजिक न्याय र सुशासनको माग गर्नुभएको छ।    दल र सरकारमा भएका कमी कमजोरी सुधार्दै अघि बढ्ने मौका लोकतन्त्रमा मात्र भएको भन्दै अन्य विकल्प नरहेको नागरिक अगुवाहरूको भनाइ रहेको छ।

मानवअधिकारकर्मी चरण प्रसाईँ, सुबोध प्याकुरेल, सुशील प्याकुरेल, नेपाल पत्रकार महासङ्घका उपाध्यक्ष उमिद वागचन्द, एटविनका वेनु माया गुरुङ, महिला मानवअधिकार रक्षकका श्याम कुमारी शाह, युवा अभियन्ता नरेन्द्र खतिवडा, काहुराष्टका अध्यक्ष हुकुम पोखरेल, सामाजिक अभियन्ता सुशील वि.क. लगायतका अगुवाहरूले आआफ्ना विचार राख्दै लोकतन्त्र बलियो बनाउन आह्वान गर्नुभएको थियो ।

देशमा अस्थिरता पैदा गरी धमिलो पानीमा माछा मार्न खोज्ने तत्त्वलाई परास्त गर्न सबै लोकतन्त्र र गणतन्त्रवादी एक जुट हुनुपर्ने र गणतन्त्रको जग बलियो बनाउन सामाजिक न्याय, सुशासन, मानवअधिकार, प्रेस स्वतन्त्रताको ग्यारेन्टी गरिनुपर्नेमा जोड दिँदै समृद्धिको यात्रामा लाग्न पनि धर्नाका आयोजकले आग्रह गर्नुभएको छ ।

यसै गरी आजै गैरसरकारी संस्था महासङ्घले ७ वटै प्रदेशमा नागरिक धर्ना दिइरहेको जनाएको छ ।